觀塘美食多，是眾所周知的事實，但係要又平又靚又正嘅可以去邊度搵呢？要做個精明食家，就要捐窿捐罅，一於帶你由朝食到晚。Let'sgo去搵抵食舖！
記者：黃錫蓮 攝影：伍慶泉
模特兒：Tiffany@TheGroup
8:00A.M.
第1站：喫超入味牛腩麵
朝早歎番個醒晨早餐先，不如食個麵啦！呢間舖喺1965年就開業，歷史相當悠久，難怪曾特首都慕名去食。
點抵食法：牛腩麵並冇因為出名而加價，十幾蚊就歎到碗入味足料的麵，仲唔叫抵？
抵食度：★★★（5粒★為最抵食）
網友食評：麵夠爽、湯夠濃，價錢大眾化，十分抵食！
合興粉麵家
地址：寶聲娛樂城內（裕民坊與同仁街交界）
10:00A.M.
第2站：過百種料龜背火鍋
見時間仲早，食得飽啲都無問題，行行吓見到呢間韓燒店以龜背火鍋見稱，甚麼是龜背火鍋？大家放心，唔係攞龜背來做火鍋，而係烤鍋個樣似龜背。烤材料時只需將肉類放在中間有坑紋的部份，讓肉汁慢慢流入鍋中混和濃湯，再放入海鮮及蔬菜便食得！
點抵食法：一爐兩用，既可歎韓燒，又可玩打邊爐，真係雙重口感，平日$88/位，消夜時段$68/位，認真抵！
抵食度：★★★★★
網友食評：
‧個爐有得燒烤同打邊爐兩用，夠晒盞鬼！
‧終於搵番十幾年前的牛肋骨味道呀！以前佐敦老舖都有甜品同軟雪糕，𠵱家種類仲有成十幾廿種。
景福宮韓國餐廳（29500900）
地址：觀塘康寧道7-9號晨光大廈3樓
12:00P.M.
第3站：歎得獎回鍋肉
中午時間，突然想食川菜，就來到呢間有30多年歷史的老字號，店內設計得古色古香，唔好以為食客都係上了年紀的人，其實熟客都有好多年輕一輩，好似張小姐和朱小姐就係常客，佢哋齊聲話：「炸銀絲卷最好食！」
最受歡迎的食物包括左上的豆沙鍋餅（$26/個）、右上的回鍋肉（$40/碟）、左下的鍋貼（$25/5隻）和酸辣湯（$30）。不得不提的是回鍋肉，因為好食到入圍03年的中華廚藝食神爭霸戰，成為10碟好菜式之一！
點抵食法：畀幾十蚊就可食到傳統風味十足的上海菜，價錢仲平過出面好多上海館好多，最緊要係用料十足！
抵食度：★★★★
網友食評：擔擔麵好香花生味，湯汁好濃，麵亦爽口，夾埋湯好好食。小籠包啲肉餡同湯汁都好好味，真係皮薄餡靚！
上海榮華川菜館（23410583）
地址：觀塘崇仁街15號地下
2:00P.M.
第4站：粟米餅最香口
食完川菜，又想再食香口美食刺激胃口，行行吓就喺一條橫街窄巷搵到呢間小店，雖然並唔顯眼，但吸引到蔡瀾幫襯，究竟佢有咩吸引之處？原來皆因食物夠正宗，係好地道的印尼菜。
用好多印尼香料製成的香蕉葉燒魚，非常惹味，辣道十足，只售$28；串燒就最適合做前菜，豬、雞、牛、羊4款串燒$5/串。椰味十足的珍多冰$18，都好受歡迎呢！
千祈唔好錯過粟米餅，因為調味料同出面不同，出面用咖喱粉，而呢度就用印尼香料，所以特別香口。
點抵食法：味道與別不同的粟米餅只售$20，仲平過出面舖頭呢！而串燒都只不過$5/串，價錢又幾經濟喎！
抵食度：★★★★
網友食評：菜式幾好食，價錢又不貴，幾個人都唔使用$100找數，是觀塘區東南亞菜的不錯選擇，而且環境算較靜。
華苑印尼餐廳（23427740）
地址：觀塘物華街4號A地下
4:00P.M.
第5站：正宗臭豆腐
步出華苑，順便去食雲南菜，發現原來佢來頭唔小，都係蔡瀾推介過的，不但夠雲南風味，用料仲好十足。
雲南臭豆腐味道清香，氣味不像市面一般臭豆腐濃烈，容易令人接受。老闆每星期都親自去雲南入貨，非常正宗。$10
快將推出的香辣雞絲涼粉，係用植物的根磨成粉，再用雲南醬料去煮，材料不但天然，更具有清熱和排毒功效。$18
點抵食法：爽口的涼拌鮮雜菌和美味有益的香辣雞絲涼粉都只售$18，一碟臭豆腐更只售$10！
抵食度：★★★★
網友食評：炸地根口感幾得意，似曾相識，如果送酒就真係幾好；烤羊乳扇有羊乳味，味道唔會太過重，食落令我想起在川西吃過的藏餐，都算唔錯！蒸臭豆腐一啲都唔臭，不過味道幾特別，同喺大陸食嗰啲差唔多。
雲南風味餐廳（21747338）
觀塘崇仁街17號舖地下
6:00P.M.
第6站：菩提林素食
食了咁多肉，都係時候食齋菜平衡吓，估唔到連食齋都可以咁好味，咁多花款！
點抵食法：幾乎碟碟都只係廿幾蚊，而且款多選擇多。
抵食度：★★★★
網友食評：最好味係個茄子，好入味。餐牌上的菜式散點較好，款式多、新鮮、夠熱、好味。
菩提林素食（23440775）
地址：觀塘道472號觀塘工業中心1期地下
8:00P.M.
第7站：海南雞飯$40全餐
晚飯時間，想到茶餐廳開餐，因為今晚要睇波，咁就要去為食貓，因為可以一邊食嘢，一邊收看有線和Now寬頻，間店仲係通宵營業㖭！
點抵食法：夜晚來睇直播足球賽事，每人最低消費都只係$28，非常抵。
抵食度：★★★
網友食評：咖啡好香，好好飲！雲吞麵味道唔錯。
為食貓餐廳（23443382）
地址：觀塘開源道63號地下
