做過唔少賤男角色嘅謝天華（Michael），衰佬形象深入民心，師奶見到佢劈頭就鬧；但最近電視劇《師奶兵團》卻一改形象，做個人見人愛嘅廿四孝老公、老竇，正以為佢從此「改邪歸正」之際，點知Michael話：「我都係鍾意嗰啲衰衰哋、古怪同騎呢嘅角色多啲，點解？夠過癮囉！」除咗要過足戲癮外，就連揀車亦一樣，「扁撻撻」、坐上去拋到暈嘅HummerH1就係佢嘅至愛，「我鍾意揀啲崎嶇不平嘅路嚟揸，咁先發揮到呢部車嘅性能，揸車同演戲一樣，越辛苦越高難度嘅就越有挑戰性，得返嚟嗰種滿足感就係無價寶！」
文：許一楓 攝影：何家亮
由「風火海」變廿四孝老公
騎呢角色 我鍾意
90年代初，3個𡃁仔經常伴林憶蓮跳舞、唱歌，佢哋叫「風火海」，可惜最多人認識、又或者隨後獨立發展、最紅最多嘢拍嘅就只有陳小春一個。至於Michael？佢先後參與過舞台劇《雪狼湖》、電影《古惑仔》、電視劇《法網伊人》等演出，不過鋪鋪都唔係擔正做主角。
從舞蹈員到「風火海」，Michael嘅發展都唔算大紅大紫，直至轉做演員都只係做啲二、三線衰男人嘅角色，心諗咁多角色唔揀，點解要揀啲醜化自己嘅角色？「我自己唔係靚仔，而演繹嘅角色都係較另類，多數係現實生活中嘅小人物，佢哋形象古怪同特別，唔係童話故事入面嘅主人翁，但我鍾意喎！」
大家最有印象嘅，相信係佢喺《法網伊人》中飾演嘅哨牙律師，但點解要戴住牙套做戲咁辛苦？「其實我可以唔戴，不過我想角色更有娛樂性，所以咪加啲嘢上去，我覺得每次做戲嘅角色都唔同，唔會悶之餘仲可以挑戰自己，幾好呀！」
無堅不摧 鎚仔軍車
螢光幕上嘅Michael賤男形象賤到底，另類角色亦夠另類，點知要佢揀部DreamCar都係貫徹始終，而且仲要係參加過海灣戰爭嘅軍車HummerH1，「佢真係一部幾另類嘅車，闊度仲闊過一條行車線，行起嚟大大份咁，行啲崎嶇不平嘅路就最能夠發揮佢嘅特質，出街夠晒招搖，一定高收視！」
只見Michael第一眼望到部H1，就好似個大細路咁：「Woo！Woo！好緊張呀，好似同女仔第一次約會咁，第一次約會唔可以咁狼死㗎，要有禮貌同風度，哈哈……呢部橙色H1喺香港我真係未見過，好想即刻跳上去揸番轉！」
HummerH1雖然「扁撻撻」，不過原來喺唔少電影中都客串過：「我記得睇過一套由辛康納利做嘅警匪電影，就有呢部車出現過，一出場佢型到爆，可以擋子彈之餘，就算成部車撞向人哋部車，人哋嗰部爛晒，佢竟然可以一啲損傷都無，從嗰時開始對呢部車就好有印象，好想有機會揸吓呢隻車。」
踩爛地 試軍車
要充份發揮H1嘅特質，我哋當然要搵個凹凸不平嘅爛地嚟試車，原本計劃到舊機場附近嘅停車場拍攝，點知去到竟全場爆滿，Michael突然彈句：「去舊機場跑道嘅GolfClub好唔好？」識講唔識去嘅佢即刻跳落車問人，見佢咁主動同熱誠嘅行徑，就知佢對部車有幾鍾愛啦，可惜去到又係撲個空，事關GolfClub早已關門大吉，最後揀選我哋嘅老地方──公司附近嘅一塊空地。
泊好車，Michael即刻打開車門，慢慢望真部車嘅設計：「佢內櫳同普通私家車好唔同，好自成一格，夠晒另類，望落去有啲舊，其實係實而不華啫，好靚呀，外表所有嘢都好似起晒槓咁，好似叫啲人唔好行埋嚟！」
隨後，佢仲一邊摸住部車一邊自我陶醉咁話：「呢部車係好個人主義Feel㗎，摸住佢感覺到佢好耐用、好硬淨、又唔易壞，真係好型，揸住佢攀山涉水都無問題，就算係水浸都唔使驚，鍾意戶外活動嘅人就更加會鍾意Hummer，我就當然會錫到佢燶啦！」
緊張時刻終於來臨，Michael正式踩上H1，摸吓啲波棍同咪錶，然後問：「點呀，試唔試吓我揸車？」嘩！咁難得，小記梗係第一時間話想試啦！一開車小記已經感覺到個人好拋，不過隔籬司機位嘅Michael就顯得相當興奮，「拋吓拋吓好過癮，咁先顯得部車夠Powerful，揸住部車再望埋前面嗰兩塊擋風玻璃，感覺好似去咗非洲搵緊獅子同老虎咁，好得意！」見Michael揸得咁開心，都知佢係Hummer嘅忠實Fans啦！
Hummer原是美國軍車
Hummer早年主力是為美軍提供大型軍車，到後來才加推民用版本，像Michael今天試開的H1便是其中之一。老實說，H1的外觀絕無美感可言，但龐大的身軀卻予人有一種霸氣十足的感覺；此外，你別以為它的車廂陳設定必簡陋不堪，查實豪華得很，甚麼皮椅、冷氣及音響組合，你也可在內裏找得到。動力核心則是一台6.5公升V8柴油Turbo引擎，扭力輸出大得嚇人，加上恒式四驅系統，用來行走崎嶇不平的路段，着實輕鬆不過。
HummerH1規格
引擎：6,500c.c.V8柴油Turbo
馬力：195ps/3,400rpm
扭力：59.5kgm/1,800rpm
傳動：4前速自動波，恒式四驅
當年新車價：$1,398,000
查詢：AutoTechfair
（23561178）
後記
拍攝完畢，照計呢輯相都應該係我哋《同車蜜語》刊登先，點知竟有人仲快過我哋出街，佢係邊個？咪就係Michael個Blog囉；事關拍攝當日佢已經帶埋私人相機，要我哋幫佢同部HummerH1拍照留念，之後嘅第二日，原來佢已經將相Upload咗上個Blog度。當「小朋友」遇着「DreamCar」嗰陣，反應就係咁大兼迅速！
網址： http://hk.myblog.yahoo.com/tselomic
