由於近呢一兩年新股太容易賺錢，香港不單止突然多咗一大批新股股民，更加湧現一大班專抽1手新股嘅「一手黨」，逢新股都抽1手，睇睇隻佳華百貨（602）認購情況就知。
下星期一掛牌嘅佳華百貨，共錄得671倍超額認購，由於集資額僅2.4億元，抽得少可以話預咗，但係呢隻股17萬份申請中竟然有95000幾份係申請1手，令申請1手中簽率低至5%，抽100萬股中簽僅0.59%，只分到2至3手，如以孖展認購，計落唔夠俾孖展息。
嚟緊嘅新股有新華文軒（811）下周一截止認購，呢隻股雖然話晒係H股，但係作為書店零售概念股，香港人又點會Buy？喺台灣書店開到成行成市，國內亦都多人睇書，但偏偏香港係文化沙漠，呢行喺香港好難Sell，況且中銀國際包銷嘅股一向麻麻，難怪初步認購反應咁差。
喺大量新股股民同埋一手黨充斥之下，抽新股已經變得越來越難搵食，嚟緊兩隻新股盈進控股同天能動力分別都係由大福同埋滙富兩間華資行保薦，相信會為新股熱降溫。唯一能夠寄予厚望相信係隻百麗（1880），假如百麗如傳聞高開40%至50%，美麗寶（1179）所持百麗便值34.8億至36.3億，仲高過公司市值。
美麗寶現價買仲有水位
最近法巴都出報告，指百麗今年度PE介乎27至31倍，預期今年盈利增長可達68%，在盈利增長強勁支持下，估值並非偏高，持有百麗的美麗寶在百麗上市後，其潛在價值達每股17.40元，建議買入，𠵱家買仲有唔錯水位。