譚詠麟、李克勤、鍾欣桐、粵劇名伶李龍同尹飛燕，噚日出席港台記者會，克勤一到場，已經有人追問佢盧淑儀係咪有BB？但克勤都唔肯正面回應，只係搞笑話：「預產期6、7月，出碟啊！6月就應該趕唔切，7月喇！」
譚校長得戚插嘴
平時好鍾意唔覺意爆料嘅譚校長，坐喺克勤側邊，最初係隔岸觀火，後來都唔覺意漏口風，譚校長話：「噚日先同克勤食飯，乜都食得，乜都叫得。」克勤又忍不住話：「年代唔同，出得新碟冇避忌，𠵱家邊有話唱歌唔食得辣、唔飲得凍水。」校長見克勤搶住發言，即刻指住克勤話：「鬼拍後尾枕喇！佢自己講咋！」
克勤多謝大家關心，尤其係阿姐汪明荃，佢話：「好多人追問新碟進度，阿姐都問幾次，阿姐真係好關心。」譚校長跟住又好得戚咁插嘴話：「係啊，問新碟活唔活躍，幾時出，幾時撐。」克勤嫂有咗，相信大家都好關心，不過克勤最應該多謝嘅係譚校長，真係多得佢唔少。
