一位讀者送來一篇痛罵風水害人之文章，內指風水術可以流傳至今，主因係利用權貴者欲求富貴延綿萬世，貧者則欲點石成金，古代失意文人利用風水術數包裝成高人，接近權貴。文章作者郭兆明又話：「風水之力何在？這是過去我們民族長期衰落的主因，故此近代有識之士堅持引用馬克思之科學唯物辯證法治國是有所據。」
風水未必可信啫，唯物辯證法治國何來科學，四九年至七六年，此法治國害死中國人，殆無疑問。呢位郭先生介紹大家讀吓台灣華成圖書公司出版嘅《風水史》，東漢王充《論衡》及清朝李綠園之小說《歧路燈》，從中可識破風水術。
有心人痛罵風水騙人，但在仍然相信唯物辯證法嘅深圳，深圳法院重金禮聘香港風水師為法院佈陣，抵抗法官紛紛落網之風，確係笑死人。法官貪污被捕，與風水何干？風水好啲，就可以繼續貪落去？諗落都令人大惑不解。
幾十年來受黨校教育，馬克思思想教育之深圳法官仍然相信風水，難怪我哋香港小民對風水之說，寧可信其有，不可信其無。設計Ｙ雖然喺著名美國大學設計系畢業，又到意大利研究現代設計，返到嚟香港，好易搵到份工之後，突然發覺，咦，啲客戶往往要求設計師畀埋風水意見噃。設計Ｙ乃正牌番書仔，留學美國多年，點知道風水為何物吖。返工半年就明白些少嘞，大機構請人睇風水，費用入埋裝修公司/設計公司條數，美其名曰內部環境改善，審計師點查？設計Ｙ諗住要長期能夠做好呢份工嘅話，有需要學埋風水，首先係識吓啲基本/基礎功先。佢間接搵人問左丁山如何搵師傅指點，左丁山正在為佢傷腦筋之際，突然收到讀者寄來痛罵風水嘅文章，一時唔知點好，於是決定拖吓先。諗耐啲，做生意要市場導向，既然人客需求風水意見，設計師答唔識，未免有損競爭力，睇怕設計Ｙ要學多一科咯。