為小朋友揀學校，有如睇孖寶兄弟過關。為咗入好學校，幾歲人仔上山下海兩文三語瓣瓣曉，沿路見金要執、有菇要食，最緊要儲足戰鬥力，因為呢頭入到好幼稚園，嗰頭又要揀小學！08/09小一入學9月派表，坊間有小一攻略班已經搶閘登場，聽到陳李張黃何太都幫仔女報晒幾千蚊個面試班，到底讀唔讀得過？不如聽聽過來人意見，要仔女入心水小學，求人自學皆有路。
記者：劉嘉蕙
攝影：何家亮、劉嘉蕙（部份相片由受訪者提供）
Model：Kitty（TheGroup）、阿B
3大面試班
ChurchillChamber 入名校率最高
價錢：$5,000/12堂(每堂1小時）
內容：着重禮儀及溝通能力培訓，不主張小朋友死記答案，另設家長面試班。
入名校率：94%獲派首3志願小學
師生比例：1:5
分校地區：尖沙嘴、銅鑼灣
記者評賣點：
1.着重評估部份，每堂課後都會和家長檢討學生表現，上課前會跟家長研究如何揀選首3志願學校，鼓勵家長量力而為，所以9成幾學生可以入到心水學校，乃係計過度過嘅結果。
2.每年搞大型入學講座講出名堂，中心總監AnnieTuen經常回應傳媒查詢，係升學界專家代表，知名度高，所以年年爆滿。
3.包裝一流，由網站、宣傳單張到課室都走英式路線，入屋要除鞋，室內有童話式佈景，小朋友上堂特別開心。
查詢：23753882
網址：www.churchillchamber.com
藝思研習社 經驗最豐富
價錢：暑期面試班分3階段，同時報2個或3個階段有優惠。
第1階段$2,000/8堂（每堂75分鐘）
第2階段$4,390/12堂（每堂75分鐘）
第3階段$2,000/8堂（每堂75分鐘）
內容：第1階段着重講古仔及培訓組織能力；第2階段教面試禮儀；第3階段強調實戰技巧，針對名校如男拔、女拔及聖保羅男女等名校。
入名校率：逾80%獲派首3志願小學，據講每年女拔及男拔小一新生有1/3讀過藝思面試班。
師生比例：1:6
分校地區：九龍塘、太子道、奧海城、中環
記者評賣點：
1.最目標為本，淨係門口塊升小龍虎榜都夠照，恍如中學補習社。
2.經驗最夠，98年起於酒店搞全港小一模擬面試，面試後出統計數據，學生參加面試有優惠價。
3.每月有email報告升學動態，提家長去學校簡介會、報興趣班等，幫家長慳番唔少時間搜集資料。
查詢：25213698
網址：www.cyberparents.com.hk
香港天才兒童藝術協會
價錢實惠
價錢：$2,250/12堂
內容：着重剖析面試程序，提升學生自信心及溝通能力。
入名校率：80%獲派首3志願小學
師生比例：1:10
分校地區：葵芳、沙田、銅鑼灣
記者評賣點：
知名度不及另外兩間學校，勝在價錢實惠，新界區都有分校。
查詢：25879001
網址：www.youngtalents.com.hk
校長、家長各有意見
小學校長：「有錢用嚟買故事書好過！」
身兼津貼小學油麻地天主教小學（海泓道）校長的小一入學委員會主席張志鴻，直言參加面試班對升讀心儀小學冇大作用，「家長要了解小一入學機制操作，如自行分配學位係計分、講關係，統一派位則由電腦決定，根本毋須面試，至於靠面試表現決定入學的私立同直資小學，目前只有少數（註：比例約為全港小學10%），唔值得為咁少位花幾千蚊讀面試班。」張志鴻笑指現行派位機制關係行先，小朋友只要有直系親屬係校友，就「啞嘅都收」，提醒家長不要錯誤投放心機。
有家長認為帶小朋友上面試班學習應對，一旦派位結果不理想，對日後叩門都有幫助，張志鴻並不認同，「叩門最看重家長誠意，過份操練小朋友可能會適得其反；小朋友面試表現反映日常家教，並唔係靠參加一兩個班揠苗助長。」
張志鴻又指，如果當畀小朋友學習社交溝通，參加面試班「冇壞」，但為入名校報名面試班則不必，「有錢用嚟買故事書，講多啲古仔畀小朋友聽好過。」
名校回應：「面試題無路可捉！」
我哋亦向熱門直資名校拔萃女書院查詢，負責人表示不建議家長帶小朋友去面試班，「第一，面試題目根本無路可捉；第二，校長閱人無數，係咪經訓練班催谷，好容易睇得出。」
至於另一新興直資名校香港華人基督教聯會真道書院，連《殘酷一叮》小台主莫凱謙都係學生，回應本報時表示：「學校透過活動觀察學生表現，形式年年不同，學生事前冇得準備，上面試班應該冇用。」
面試班有用派
個案1：鍾太
鍾太去年畀仔仔讀ChurchillChamber面試班，覺得效果不俗，亦有推薦朋友的仔女報讀，「佢上堂教嘅嘢我之前冇諗過，有啲細節位如離開面試房要拉凳、回答問題要完整等，加上師生比例細，老師跟得足，又會幫手貼題目，出嚟結果都幾理想。」
結果：兒子去年面試5間直資及私立學校，獲其中3間取錄，包括九龍塘學校及宣道小學，但最後選擇入讀由統一派位的聖若瑟小學。
意見：鍾太指即使不為入名校，讀面試班也有好處，「當時我仔仔係獨生子，就當畀佢學習同人溝通相處。」
個案2：Alice
Alice表示當年畀囡囡參加面試班，出於「冇蝕底」心態，「我唔會俾自己機會後悔！」事後分析，她認為課程內容唔多唔少有幫助，操練之後答問題會流暢啲，而一啲禮儀平時我都會教，上堂可以幫佢加深印象。」
結果：女兒現年讀小一，去年統一派位結果不理想，事後叩門獲嘉諾撒聖家書院取錄，之前亦獲數間直資及私立小學取錄。
意見：Alice認為如家長手頭預算鬆動，參加面試班無妨，「有多餘錢的話，當畀小朋友多個活動，但係如果要死慳死抵就冇咁嘅必要，因為到頭來都係睇小朋友自己表現，入面試班唔係寫包單入到名校。」
面試班冇用派
個案1：胡小姐
胡太04年安排讀K2大仔上面試班，花約$3,000，今年幫細女準備入學，她決定不再花寃枉錢，「一方面材料有晒，我自己教都得，另外好多練習其實幼稚園都有，毋須額外再做。」
結果：長子去年參加面試班，但未獲心儀學校取錄；次女現年K2，但胡小姐希望安排女兒入讀國際學校或IB學校，故不會帶她參加面試班。
意見：她認為上面試班並無必要，「面試班教背誦答案，唔係憑小朋友自己Knowledge答，結果往往弄巧反拙，你追問多句，佢就答唔到。」對於去面試班學溝通相處，胡小姐亦有保留，「小朋友點同人相處靠長期建立，上一個Course冇可能Push到佢變另一個人。」
個案2：鄭太
鄭太去年11月開始帶細女去面試班，直言完全出於朋輩壓力，感覺無奈，「我心理上好抗拒，但係身邊家長講到小朋友唔去實死咁，加上女校競爭比較激烈，惟有帶佢去。」
結果：鄭太有一子一女，長子入讀拔萃男書院附屬小學，之前沒有參加過面試班；細女現年K2，正參加面試班。鄭太指從未向囡囡提及上面試班乃為準備小一，佢讀得開心就算，「有啲內容都OK嘅，例如佢問搭地鐵唔見咗媽咪點算，呢啲我都未諗過。」課程內容可刺激思維。
意見：鄭太質疑部份內容是否需要花錢去學，「我大仔入男拔萃都冇去面試班，我喺屋企搵陌生人同佢練面試，自己錄起過程再同佢檢討，效果都一樣。」
自學有法：攻略書大檢閱
《香港直資‧私立小學巡禮》$78
重點介紹17間直資及私立學校，有齊校長及師生專訪，資料夠詳盡，面試呢類學校前最好睇睇，對學校會有更全面了解，由TOM（CupMagazine）PublishingLimited出版。
《06/07升小選校全攻略》$80
明報出版，多名家長及升學專家一致推介，介紹學校嘅資料最豐富，選校策略部份亦多元化，仲摘錄教統局視學報告內容，不過今年唔會出新版。
《全港小學入學天書小學精選》$110
親子集團荷花出版，重點介紹40間官津小學、私立及直資各10間，亦有搵名校校長講貼士，今年6月會出08/09年新版，不過有家長話資料唔係咁Update。
《小學指南》$118
同類攻略入面最貴，不過資料唔算最齊，講面試同入名校攻略部份冇其他幾本咁具體，今年6月中會出新版，希望可以有多啲最新資料，由小牛社出版有限公司出版。
現階段準備功夫
搜集資料
除咗參加面試班及買升學攻略書外，建議家長勤上網Check最新消息，尤其教統局及各學校搞嘅講座。
教育統籌局網址： http://www.emb.gov.hk
教統局24小時熱線：28910088
小學概覽網址： http://embhsc.hkedcity.net/primary
教搜社小一選校家長輔助手冊網址：
http://www.hked.org/primary.htm
入官津小學懂計分
學張志鴻校長咁講，官津小學自行分配學位「講關係」，得閒Click上教統局網站研究計分方法，睇吓入名校機會率有幾高，唔好不自量力嘥咗個Quota。
了解學校要求
新興直資或私立學校教法較多變，考試較少，不過ChurchillChamber嘅Annie提醒家長，呢類學校可能要求家長高度配合度高，如果家長自己冇咁多時間陪小朋友做Project，會直接影響日後小朋友的學習表現。