近幾年樓上Cafe冒起，年輕人玩又得Hea又得，已變成生活中唔少得嘅一環。Cafe主題也五花八門，卡通、貓狗主題Cafe大家都去得多。競爭咁大，要突圍，明確的主題的確唔少得。今日介紹兩家主題Cafe，一家玩懷舊唱歌跳舞，另一家玩飲茶，聽落老餅，不過後生仔話：正！
記者：王立釗
攝影：楊錦文、部份相片由受訪者提供
Model：k．r
愛心奉獻$42
只要將手上拎住的心心放入熱水，鼻裏聞着陣陣花茶香味，約5分鐘就會在杯中慢慢開出一朵花，齋講視覺效果都夠特別！
懷舊主題切磋歌藝
第一次步入「音樂人家」時，印象是「好闊落！」它的面積較一般樓上Cafe寬敞，佔地2,000呎，與一般小型Cafe逼滿梳化不同。叫得音樂人家，賣點當然係音樂，店內放置一部價值數萬元的鋼琴，再加上頂級的音響設備及多個專業的喇叭，單單音樂上的投資已達六位數字。咁落力投資音樂設備，全因店主方俊在70-80年代是一位歌手，所以店內亦有齊唱歌鋼琴等設備，顧客可隨時把Cafe變身懷舊歌/舞廳！店主方俊帶點感慨：「以前喜歡到歌廳聽歌，也喜歡聽演唱會。不過好的演唱會不是經常可以聽到，希望有一個地方，集合一班好歌之人，互相切磋較量歌藝，推廣好歌！」
店內分兩區，餐桌區比起一般Cafe寧靜。平日耳邊響起的，是經典中西歌曲，讓你回味一下70-80年代好歌，在近排鬧得熱烘烘的集體回憶熱潮，相信在這裏定必能讓大家回味以往的經典。興之所至時店主都很歡迎大家在舞池上翩翩起舞。
花茶識開花
話晒係樓上Cafe，一般西式小食及意粉當然不會缺少，但意想不到的是餐湯上連中式食物都有提供。更意外的是店內提供特色花茶。單單看花茶如種子，放在熱茶中慢慢開出花來，已經夠開心，用來逗女性朋友保證佢滿意！
王菀之都幫襯！
音樂人家開業約5個月，由於設備不俗，王菀之歌迷會都在這裏搞過活動。
顧客有Say
好特別，尤其係除咗有舞池外，仲有人唱歌！雖然係唱舊歌，但咁先有味道。
環境好舒服，唔似其他Cafe咁嘈。無諗過Cafe會有中湯飲，食物份量好大。
啲仔女帶我嚟，佢哋話呢度有得食仲有得跳舞喎。上到嚟又真係幾舒服。
「音樂人家」消費指數
下午茶時段$38起
晚餐時段$68起
另設有包場服務，詳情可參閱其網址
音樂人家網頁：
http://www.cafemusical.com.hk
營業時間：
星期一至日：2pm至12pm
地址：尖沙嘴山林道23號2/F201室
電話：29920722
中西合璧Cafe歎中茶
去到上樓Cafe點一杯咖啡來一壺花茶，相信是大家指定動作。但有否想過到Cafe點一壺普洱或龍井呢？你無聽錯呀，𠵱家品茶已不是茶樓的專利，位處於旺角上海街的下關茶莊（SenseCafe）就是一間中西合璧的複式Cafe。一踏進Cafe，就可看到一條通往上層西式Cafe的樓梯，西式試得多，今日重點推介去下層飲茶。在茶莊裏，各式各樣的花草茶、綠茶、龍井至各式普洱包括柴大溢、沱茶、散茶及班章老樹、陳年珍品普洱都有為大家準備好。後生仔想學品茶，唔使擔心價錢貴，不同茶都有不同定價，最便宜的由一蚊起，便可以細味品嚐（另付$38的水費，無限次加水）！
以鐵觀音$2為例，再加$38水錢，就已經可以無限次添飲，同朋友一齊分享少少錢已經可以試唔同茶啦！
三色乳酸特飲$48
話明中西合璧，中國茶外仲有特色乳酸特飲，一Set6杯3種顏色，在炎炎夏日可使大家一消暑氣。當中以三色乳酸特飲最受客人歡迎。
下關茶莊（SenseCafe）消費指數
個人消費約$40
燒烤收費平日每位$128起，假日$140
品茶收費：$38水費（付款後無限次加水）＋茶葉價錢
營業時間：周一至周日：3pm-2am
地址：旺角上海街521號1樓
電話：26259900