財金界求才若渴，賓架跳槽唔使憂。繼早前星展銀行嘅張宗永「水哥」，過檔蘇格蘭皇家銀行做亞洲區司庫後，華華聽聞，工銀亞洲財資部主管陳鳳翔（Wilson）做埋呢個月，亦會有新動向，但最終落戶邊家銀行或金融機構，𠵱家仲係未知數，市場傳聞佢有幾個offer諗緊，佢老哥會稍事休息，遲啲先再戰江湖。
Wilson81年投身財資市場，最先加入廣東省銀行，炒房歲月嘅第一個師傅係林炎南（現中銀香港副總裁），後來中銀集團外滙交易中心成立，Wilson就過檔外滙中心發展，95年左右轉投工銀亞洲，至今約12年。不過，4、5年前，佢曾經短暫離開過，加盟恒生，但好快就回歸工銀亞洲。
輯錄佢老哥喺報館撰文而編成嘅《債券投資》一書，04年在港出版，已經印到第4版，聽聞最新修訂版會喺下周一印好，新版收錄咗佢對人民幣在港發債等新發展概念嘅見解。
[email protected]