香港散戶對QDII趨之若鶩，不過，大陸散戶就唔係咁諗，覺得中央呢一招，係分薄大陸股市嘅資金，最驚放寬幅度越嚟越大，到時大陸股市就冇𠵱家咁長升長有。
網友平凡的老百姓就喺《新華社區》度，呼籲全國網民站起來，堅決反對開閘全民QDII。
斥 推錢出街幫人贈興
佢話：「開閘QDII真係愚人政策，將國民嘅錢放出去，幫其他地方股市贈興，真係儍。仲想開放普通民眾都QDII，我懷疑管理層係外國資本喺中國嘅代辦。點解A股嘅市盈率可以比其他地方高，無非係因為中國投資者多，𠵱家放佢哋出去，俾出面嘅人劏。呢個同人民幣可以自由兌換有乜嘢分別？提出呢個政策嘅人，既唔識經濟，又無腦！」
平凡的老百姓仲話每次推出重大經濟政策，都暴露高官嘅水準同能力幾咁唔掂；認為查違規資金同按揭貸款資金，先至係正道。
怕 崇洋散戶盲目投資
雖然有人嗌晒十萬火急，牛英九就好老定咁話：「火急嚟做乜嘢？杞人憂天，你想去（其他股市投資）咩？你唔去，其他人都唔會去，咁有乜嘢好急？」牛英九仲話，境外嘅股票，睇唔到又摸唔到，唔係絕對賺錢，好難吸引普通老百姓。
不過，網航員就警告：「崇洋心態可能會令到啲散戶盲目選擇海外股市，唔會理智投資。」
http://big5.xinhuanet.com
報料站
歡迎提供網上財經趣聞，資料一經採用，酬100元。
請附姓名、電話及電郵地址，交[email protected]