薛凱琪和梁詠琪（GiGi）前晚在灣仔出席新戲《女人．本色》煞科宴，被導演黃真真形容為「奪命雙琪」的她們，全晚有講有笑，猶如一對好姊妹般，粉碎不和傳言。GiGi對於舊愛鄭伊健的女友蒙嘉慧在《溏心風暴》中演狐狸精，她謂沒有留意。
改編自作家梁鳳儀小說《心濤》的電影《女人．本色》，由黃真真執導，梁詠琪、薛凱琪和林子祥主演，該片前晚在灣仔舉行煞科宴。GiGi跟薛凱琪坐在主家席上有傾有講，粉碎不和傳言。GiGi更手拿紅酒，不停撩身旁的薛凱琪及許紹雄亁杯，二人更一亁而盡，顯得非常老友。
「我都冇睇套劇」
導演黃真真在台上稱GiGi和薛凱琪為「奪命雙琪」，她說：「佢兩個角色一個突然令你笑死，一個令你喊死。」薛凱琪表示在戲中有一幕跟GiGi一齊穿着OL衫，她大讚GiGi穿得很型，自己就好cutie（可愛），兩人又互相擁抱，GiGi笑言大家似同性戀。
有報道指蒙嘉慧在《溏心風暴》中的角色原本是女主角，但因跟鄭伊健拍拖後，形象受損，無綫刻意大幅刪減她的戲份，更塑造她成狐狸精，身為伊健前女友的GiGi被問及可知此事，她說：「吓！我呢排拍戲好忙，冇留意人哋嘅嘢，我都冇睇套劇，唔知啲劇情。」
薛凱琪稱拍戲前跟GiGi不太熟稔，拍完戲後大家有交換電話號碼，她說：「我上次整親腳，GiGi都有打電話問候我。」問她可有跟對方分享感情生活？她說：「冇呀，我唔慣同人分享心事，講畀人聽對件事又冇幫助，講嚟冇用。」那麼她可有跟緋聞男友房祖名講心事？她說：「唔會，同佢講笑話多啲。」
林子祥變茄喱啡
林子祥表示首日拍戲便要跟GiGi拍床上戲，他笑說：「其實一早講掂鏡頭同有幾多個shot，邊幾個位，就係咁多，唔會再多。」黃真真則大叫：「係呀，我冇叫停。」阿Lam說：「呢套戲由女人做主角，我哋就變成茄喱啡，下次應該拍部《男人本色》，等佢哋做茄喱啡。」
採訪：王連連
攝影：陳志嵐
