有些食物是天生萬人迷，如雪糕很少有人SayNo。香港夏天熱到癲，偏偏雪糕滴滴滴，男女老幼照樣食食食，食到儀態不理可能就叫真愛。有人話真愛經得起考驗，清純如呍呢拿味雪糕，可以日日食唔厭，但當變身做芥末香腸或番茄Tabasco時，到底你們還愛不愛呢？
記者：劉嘉蕙
攝影：陳盛臣
試食雪糕要勇氣
面對怪味雪糕，食嗰個同叫人食嗰個同樣需要勇氣。話說幾日採訪氣溫都接近30度，雪糕上手幾分鐘即溶，有人見到咁嘅形勢都肯停低試味，已經好難得；望住眾人將半溶雪糕擺入口後面容扭曲，實在令記者覺得良心不安，擔心咁多位小朋友自此對雪糕蒙上陰影，人生少咗好多歡樂。而我3日來食足十幾種味都冇肚痛，反而開始懷念街邊雪糕車的呍呢拿雪糕，發覺平凡簡單才幸福。
芥辣香腸雪糕$24（b）
暗黃帶紅點係芥辣雪糕，白色嗰團係德國白腸雪糕，Gimmick爆燈，好唔好食視乎你有幾鍾意芥辣味，有小朋友好鍾意，記者就唔係Fans，鼓起勇氣放入口，0.1秒後想大叫，只恨雪糕入口後太難吐出嚟！
Max
Mustardice-cream？Ihateit！
Oliver
諗住雪糕好好味，原來係芥辣味，我好想嘔呀！
Rachel
究竟我食緊乜，好難食呢？
Roby
幾好味喎！可唔可以食多啖？
配麵包食
iscream老闆Paolo自創芥辣香腸雪糕食法，用黑麥麵包加白腸點雪糕食，成個餐賣$60，比齋嗒雪糕球易入口好多。
北海道海鹽雪糕$23（c）
雪糕店姐姐話海鹽食得多有美容功效，鹽味雪糕第一下入口幾鹹，慢慢牛奶味比較突出，不過食完後鹽味黐住條脷，飲好多水都仲係鹹鹹哋。
Shirley
有啲似乳酪味或芝士雪糕，幾好食。
Ling
鹹中帶甜，比較似呍呢拿味。
瑩瑩
好好食，唔覺得鹹喎！
昆布雪糕 $25/120ml $80/480ml（d）
人手製昆布雪糕，入面有粒粒真昆布，咬落鹹鹹哋、脆脆哋，有種海水嘅味道湧埋嚟，拎去沙灘伴住海浪聲食最啱Feel。
Rachel
都幾好食，昆布咬落硬硬哋。
妹妹
完全估唔到乜嘢味，唔係呍呢拿咩？
阿Ling
昆布味唔係好重，都唔難食嘅。
番茄Tabasco雪糕 $28/兩種味（a）
材料有車厘茄、Tabasco，少少伏特加、鹽及胡椒。入口先有車厘茄微酸，Tabasco味隨後攻上，食晒成個後有少少嗆喉，似飲咗BloodyMary。
Steve
好怪的味道，有點像台灣的番石榴，酸酸哋。
Angetica
Tabasco味好刺激！
Joel
都係我自己叫嘅雪糕好味啲。
Andy
有番茄味，怪怪哋。
其他特色雪糕
1.艾草雪糕$23（c）
艾草日本名yomogi，係整草餅之材料，貌似綠茶雪糕，入口勁重甘草味，苦苦哋，完全係細個時喺屋企玩食草餅走紅豆餡嘅感覺。
2.藏紅花雪糕$22（b）
藏紅花經常被用來整西餐汁底，本身略帶苦味，變成雪糕後，味道不算太強烈。
3.櫻花雪糕（杯裝）120mL$25 480mL$80（d）
粉紅色雪糕好幽雅，聞落有櫻花清香，入口似普通牛奶雪糕，花本身冇乜味。
4.生薑雪糕（杯裝）120mL$25 480mL$80（d）
雪糕落足料，完全係薑汁撞奶雪凍版，薑味非常濃郁。
5.牛肝菌雪糕$22（b）
野菌味撲鼻，入口菌味勁強烈，建議齋舖引入做甜品。
6.紫番薯雪糕（杯裝）120mL$25 480mL$80（d）
紫番薯雪糕用真材實料，入面有大大嚿紫番薯，連埋雪糕雪凍成冰，恍如食雪葩。
7.泰式黑糯米雪糕$22（b）
唯一一款令記者情不自禁食咗半個有多嘅雪糕，椰香同牛奶味道始終最配合。
8.德國黑啤雪糕$24（b）
採用德國Weiss黑啤，麥香濃郁，啤酒味重，男士食住睇波應該好暢快，女士食住行街可能會醉咗！
9.話梅雪糕$22（b）
意式雪糕港式風味，話梅雪糕是九製話梅雪凍走核咁嘅味，又酸又鹹，都幾開胃。
（a）GustoGelato（64001471）
地址：銅鑼灣廣場2期地下G03舖
（b）iscream
地址：金鐘太古廣場2期地庫GREAT
（c）J-Farm（28933998）
地址：灣仔軒尼詩道288號英皇集團中心地下G12舖
（d）Milktop
於UNY及銅鑼灣Sogo設有銷售點
