人物：車淑梅、梁家輝
時間：92年6月
地點：香港
經過：梁家輝同車淑梅，雖然一個做戲，一個喺香港電台做DJ，兩個人睇落大纜都扯唔埋，但十幾年前，佢哋兩個因為小誤會搞到反面，家輝一度扯火鬧車淑梅比八婆更八婆。
92年6月，家輝本來答應做港台DJ陳海琪嘅訪問，港台喺冇知會家輝嘅情況下，叫晒記者到場採訪，家輝知道之後好唔高興，臨時甩底。車淑梅後來喺自己節目中發表意見，話家輝個保母辦事不力，家輝知道之後好㷫，除咗寫信向港台高層吳錫輝投訴外，仲周圍同人講話車淑梅比八婆更八婆，兼且有特殊身份，有港台高層老公張文新包庇。事後車淑梅接受傳媒訪問時，話聽到家輝鬧佢八婆嘅傳聞，如果對方咁講，就真係好冇風度。車淑梅強調，自己當日只係話有啲時候藝人保母聯絡工作做得唔好，並冇指名道姓針對邊個。
其實同年4月1號愚人節，車淑梅曾經喺節目整蠱劉德華，話佢屋企俾人打劫，搞到華仔好驚，雖然車淑梅即刻同華仔澄清只係講笑，但係搵呢樣嘢嚟講笑，真係好過份！不過，車淑梅雖然成日開口夾着脷，但都竟然喺同年當選傑青，兼且仲係幾屆全港最受歡迎DJ，認真估佢唔到。
本欄逢周一至周六刊出