呢排內地股民熱血沸騰，大家都想搵快錢，但搵錢都要合法，上月中旬，內地流傳基金公司上投摩根一位本來年輕有為嘅基金經理唐建，因為涉嫌有老鼠倉行為，被內地監管部門審查，事件噚日明朗化，上投摩根公布，話唐建正受中國證監會調查，仲免去佢成長先鋒基金經理一職。
據內地《財經》雜誌所講，呢位33歲、曾被選為業內研究員第一名嘅唐建，喺仲係基金經理助理時，已夾埋老竇及第三者開戶做老鼠倉，喺基金建倉前買入一隻叫新疆眾和嘅股票，最後兩個戶口獲利150萬人仔，都幾狼死。內地所講嘅老鼠倉，同香港一般講嘅概念其實唔同，香港所指係無良經紀對客戶從中食價。
佢04年加入上投摩根，06年一手湊大成長先鋒基金，發行規模54億，到06年底突破百億，喺內地股票型基金的回報率排到45位，算唔錯，可惜唔爭氣。呢單相信係中證監清洗老鼠倉行動嘅首幕。