近排市場興講併購，睇傳媒大亨梅鐸話想買道瓊斯公司，已經引發滿城風雨，美國鋁業又話要敵意收購加拿大鋁業，而早排紐約證券交易所同Euronext合併亦已成事。香港呢邊，雖然冇乜大併購消息，但港交所會唔會被併購，一度成為話題，港交所主席夏佳理，噚日就講到交易所合併嘅問題，不過佢話，燒唔到港交所呢一邊，係都講新加坡同澳洲交易所合併啦。
夏主席噚日接受路透社訪問話，大家都以為，戴姆勒同克萊斯勒兩間都係做汽車，合併梗係掂啦，之不過近日戴姆勒最終都要出售投資咗九年嘅克萊斯勒，證明合併未必一定有協同效應，正所謂久合必分。所以話交易所之間合併，唔一定係好。當然，港交所其實有條款可免被敵意收購，因為唔准單一股東揸多過5%。
緊張內地股民
對於同內地交易所融合，夏主席話，𠵱家講太早嘞，因為香港同上海及深圳交易所係完全唔同嘅體制，佢哋基本上係政府控制，都未上市，唔同港交所，而且商業上冇乜迫切性要合併，但佢就話好樂意提供協助，令內地交易所邁向國際水平。
講到內地，近期A股市場大旺，令人擔心會否出現泡沫，夏主席都好緊張，佢話如果出現調整，希望係軟着陸，佢又不忘苦口婆心咁呼籲內地股民，最緊要認清自己買啲乜嘢投資產品，唔好做羊牯。
[email protected]