康健國際噚日宣布收購美國Nu/HartHairClinics51%權益。康健一早入股Nu/Hart香港分店，同樣揸住51個巴仙，當年獨具慧眼，全因康健國際主席曹貴子醫生親身試驗。
話說兩年前嘅暑假，曹醫生以身試（植）髮，喺後腦開刀攞自己嘅真髮植去冇頭髮嘅地方，要做局部麻醉，佢作為醫生覺得只係濕碎嘢，仲一邊睇電視一邊食嘢㖭，佢植咗約2000束頭髮，每束50蚊計要成10萬銀。為咗測試植髮技術有幾得，佢第二日就飛去美國廸士尼大玩特玩，結果植髮真髮一樣打風都打唔甩。
Nu/Hart目前只係經營植髮同激光頭髮再生，收購後將增設男性性功能護理等服務，收購價4000萬港銀。康健亦提供1170萬嘅貸款畀Nu/Hart擴張，目標1年後增至18間，Nu/Hart提供5年利潤保證，包賺4000萬。
[email protected]