張栢芝去年9月突然跟謝霆鋒在菲律賓小島秘密結婚，事前未有知會所屬經理人公司中國星，向來對栢芝愛錫有加的向太，因被對方蒙騙而感痛心疾首，加上栢芝現已懷有身孕，昨日向太在中環出席公司活動時，坦言已跟栢芝解約，因為對方令她心灰意冷，所以她不想糾纏下去再傷自己的心。
向太陳嵐及丈夫向華強昨日在中環，出席中國星旗下地產部收購澳門金域假日酒店的記者會。身為中國星旗下藝人的張栢芝於去年9月突然跟謝霆鋒於菲律賓小島秘密結婚，並將一向痛錫栢芝的向太蒙在鼓裏，直到兩人已婚消息曝光，栢芝才跟向太交代，目前她更懷有近八個月的身孕，工作全面停頓。
「佢都冇諗後果」
昨日記者問向太可有跟栢芝聯絡，怎料一聞栢芝名字，向太已十分激動，她說：「冇，冇聯絡。」問栢芝的合約情況如何，向太續說：「解除咗合約，係我要求，佢未大肚之前大家已經解除合約，咁樣對大家都好啲，係一個完結，我唔想再激氣，祝佢幸福。」
至於栢芝早前欠中國星的債項如何處理，向太則說：「𠵱家仲計緊，但係唔會爭太多，佢都有幫公司賺錢，而佢之前接落嘅廣告有啲就斷咗，佢都冇諗後果，總之𠵱家冇事。」
「開兩套戲谷佢」
提及栢芝獲悉解約的反應，向太開始眼濕濕地說：「佢話無論如何都想喺呢行，但佢結咗婚，可以搵英皇。有乜問題，可以再搵番我哋再傾。我都唔想，喺藝人管理方面我擺咗好多心機，但太傷心喇！之前太投入，估唔到自己會放棄，再糾纏落去，更加傷自己嘅心。」
向太續說：「之前的確好激氣，幾年前佢因為感情有問題，跌得好犀利，又病又發燒，唔可以做任何嘢，我即刻開兩套戲《大隻佬》同《忘不了》谷佢，但佢連對白都唔記得，俾導演鬧，以前佢可以記晒四個人嘅對白，我迫公司開戲係想佢起番，唔想佢一沉不起，點知又嚟一次，佢結婚，我祝佢幸福。」
向太表示已有年多沒有見過栢芝，她稱可能大家都逃避不想見面，向太稱：「今次件事令我好心灰意冷，對人好冇用㗎！」至於翻版栢芝閻清會否被力捧，向太表示：「我唔會好似以前咁投入，要乜就畀乜佢。」
撰文：丁寧
