時間：02年9月15日
地點：中環
人物：梁朝偉、翻版LeeAnn
《經過》劉嘉玲同梁朝偉嘅愛情長跑，去年俾台灣富豪郭台銘介入，郭台銘擺明力追嘉玲，仲唔停咁公開挑釁情敵偉仔，搞到偉仔呢排出席活動都變成「憔」偉。
其實偉仔同嘉玲拍拖咁多年，男方咪一樣緋聞不絕，不過就好少俾傳媒影到佢偷食。02年，一向謹慎嘅偉仔難得偕女伴夜遊中環時，竟然遇上記者追訪，當時同行嘅兩名女子，其中一名長髮，另一名係短髮、貌似模特兒LeeAnn嘅妙齡女子。
當晚天文台發出紅色暴雨警告，偉仔同翻版LeeAnn送咗長髮女子上車，剩番佢哋二人世界時，偉仔肆無忌憚攬住女方纖腰，二人共用雨傘雨中漫步，鬼咁浪漫，其間又不停咬耳仔。當發現記者追訪後，二人好敏捷咁彈開，偉仔立即上咗泊喺路邊嘅座駕，獨剩翻版LeeAnn面對鏡頭，佢為咗迴避記者，仲用唔純正嘅廣東話話：「你（記者）唔好再影呀，我叫差人拉你。」問到佢個名同點識偉仔時，佢又話：「我唔答，我唔講，你唔好再影呀！」
偉仔因為等唔到翻版LeeAnn上車，見到記者行近架車，佢好唔耐煩咁豎起中指，跟住冇等女伴上車就火速開車，可憐翻版LeeAnn搵唔到偉仔架車，佢話：「咦？架車呢？走咗嗱。」佢最後只好坐的士撇甩記者。偉仔近年都好少再俾人影到身邊有女伴，反而最多係佢夥同性好友吳廷燁去玩。
本欄逢周一至周六刊出