我愛陽光，所以曾對開篷車有過憧憬，但無奈香港濕熱，試過有次揸開篷車懶優皮咁去沙灘曬太陽，結果唔夠一陣就曬到底褲都濕埋，內櫳仲入埋沙！所以家陣學精咗，揀呢部有天幕式大天窗嘅OpelAstra1.8嚟試，暖暖陽光穿過玻璃直射車廂，裏面開行冷氣，陣陣涼風涼到入心，帶埋靚女Model一齊感受冷靜與「熱晴」之間，咁先至叫做優皮嘛。
記者：周達之
攝影：何家亮
模特兒：Tobey
天幕式天窗
新版Astra1.8其實大改唔多，最重要係副偈由之前嘅125匹加到140匹，多咗15匹。外形方面就喺細處着眼，例如鬼面罩邊位同頭燈都加多咗電鍍物料，睇起嚟醒目啲；而其他部份都係繼承番上代設計，例如方便後座乘客上落嘅大車門，車頭成三角形設計嘅家族式造型等等。但最吸引人嘅，仍然係嗰個可以稱呼做天幕嘅大天窗，差唔多成個車頂打通咁滯，試車當日陽光普照，光線直插入車，而小記就開行冷氣，既可以享受暖暖陽光，又唔使熱到出汁，實在太爽。
高級鋼琴面板
一睇內櫳，發覺中控台換咗塊黑膠殼，無乜特別，但坐喺側邊嘅Sales哥哥隨即話呢塊唔係黑膠，而係「鋼琴面」，嘩！咁又唔同，即刻高級好多，直情成個感覺唔同晒㖭啦！另一個改動係門邊加咗條鋁合金裝飾，亦係幾搶眼。其餘嘅仲有例牌音響CD收音機冷氣按鈕，編排得幾簡潔，至於嗰個單色LCD顯示屏就的確敗筆，字體粗糙，非常Low-Tech，好似時光倒流幾十年咁。
軚盤有埋音響控制按鈕，聽歌嗰陣就最方便，軚盤嗰度本來亦有用嚟接電話嘅按鈕，不過香港呢個版本就改咗做轉換LCD顯示畫面嘅按鈕，似乎仲實用啲。
運動模式更有勁
歐洲車出名紮實，呢部Astra1.8都唔例外，雖然有個大到無倫嘅天幕，但係一啲都無影響佢嘅剛強性，片彎嗰陣仍然感覺紮實。至於懸掛方面亦係一般歐洲車風範，簡單啲講即係偏硬，無日本車咁柔，小記見中控台有個「Sport」掣，於是㩒吓睇吓個懸掛會唔會變，但發覺原來係無分別，改變嘅係令引擎會Keep住高轉數，差唔多要到6,000轉先轉波，令到架車更有爆炸力。另外油門同軚盤都敏感咗，揸起上嚟的確爽好多。
Astra1.8另一個優點係寧靜，引擎唔係嘈喧巴閉嗰隻，雖然佢有個天窗，但外面嘅聲音都唔係咁容易鑽入嚟，拍攝嗰陣我望住喺出面嘅攝影師，見佢口擘擘好似好大聲講緊嘢咁，之但係小記喺車廂裏面居然完全聽唔到佢講乜，可想而知隔音幾咁勁。
記者意見
小記試車都算係粗豪，但估唔到同行嘅Sales哥仲豪過我，到佢揸嗰陣為咗顯示出部車嘅剛性，於是喺上山彎路忘情勁片。架車嘅剛性係其次，小記只係擔心自己嘅剛性唔夠。
行家意見：SalesNiki
呢部車嘅賣點係慳油同夠安全，佢全車有8個氣袋，而且係Fullsize，唔係細細個袋都當係一個，另外佢轉波順暢亦令乘客感到十分舒適。
OpelAstra1.8規格
引擎：1,796c.c.直4DOHC
馬力：140bhp/6,300rpm
扭力：175Nm/3,800rpm
傳動：4前速自動波
尺碼：4,249×1,753×1,460mm
重量：1,228kg
售價：$198,000
車輛提供：合朗汽車（27608668）