「我小時候他已很紅」
馮仁昭四圍超：黃曉明簽約踩親城城 - 馮仁昭

憑演內地劇《神鵰俠侶》嘅楊過一炮而紅嘅29歲內地男星黃曉明，𠵱家喺內地紅到發紫，連「小小超」李澤楷旗下娛樂公司「大國文化」都簽佢做歌手，噚日仲喺北京舉行盛大記者會，宣布神鵰大俠加盟。
黃曉明加盟新公司，成為郭富城同門師弟，問佢有冇諗過會俾人將佢同城城比較時，黃曉明用普通話講：「我覺得不會有比較，因為他是我的前輩，在我小時候，他已經很紅，有機會要向他多學習，比較是不可能的，對他來說，我是新人。」佢猛話41歲嘅城城年紀大，睇怕佢都唔記得當年林志穎因為開玩笑話城城似佢爸爸，而搞到被城城fans杯葛嘅風波啦。

白馬王子狂收禮

其實噚日嘅記者會認真大陣仗，花費六位數字，搭建宮廷花園布景，黃曉明着嘅白馬王子裝價值10,000蚊人民幣，可惜有啲娘。出席者有送上權杖畀對方嘅高層李進同送咪嘅廖雋嘉等，華誼兄弟公司代表送上鸚鵡，仲有逾百「鵰迷」撐場。
同場首播新歌《暗戀》MV，不過女角就由之前盛傳嘅林志玲變成台灣模特兒白歆惠，記者笑黃曉明應該搵緋聞女友應采兒做MV女角，佢即刻話：「有機會的話都會吧。」後來佢獻唱時勁冧fans，搞到鵰迷𠵱嘩鬼叫。李進又形容黃曉明係新天王，遲啲會安排佢分別同城城及許慧欣合唱喎。