逢係夜麻麻去麥記，成班𡃁仔自不然雞啄唔斷！Sorry，唔係討論緊邊隻漢堡大件夾抵食，而係深夜約埋一齊玩PSPOnline遊戲《MonsterHunter》，好鬼刺激喎！淨係呢隻Game可以招呼班老友？又唔一定，Game壇「老大哥」SQUAREENIX就啱啱推出《FF》系新作──《FinalFantasyTactics獅子戰爭》。遊戲雖移植自PS年代，但戰鬥模式採用全新3D戰棋畫面，加埋可以Online圍抽敵人攞經驗，以後上24小時麥記又多樣新嘢玩！
記者：陳國輝
3D插畫隨時睇番
第一次開隻Game玩，諗住先欣賞一段精采Opening，點知得幾幅畫，幾句對白交代吓就算，真係超無癮！原來好戲在後頭，喺遊戲進行期間，不斷會出現動畫情節，而且係勁卡通Feel嗰隻CellShading，同PS2版嗰種極細膩嘅風格，完全兩回事。另外值得一提係，玩緊嗰陣《FFT》會採用BraveStory系統，亦即記錄低玩家經歷過嘅不同動畫情節，畀你事後隨時回顧，甚至當搜查到某些重要寶藏嘅話，仲會立即播放一段小插曲。幾時會遇到呢啲筍嘢？搵唔到都要靠攻略喇！
網上合力殺敵儲寶物
RPG都唔一定焗住玩單打！《FFT》嘅Online模式提供兩種選擇畀你：一係與網友為敵，二為同一陣線；只要你進入遊戲然後去到「酒場」，就可以同網友自行設定一啲戰鬥規矩，例如戰場、遊戲規則、挑選出場陣容、設計陷阱等一連串行動；唔想對戰，亦可選擇夾攻抽電腦，如果其中一方輸咗，對你嘅育成角色、遊戲進度並冇任何影響，相反其中一個贏咗，唔單止兩人同樣獲得豐富經驗值，仲隨時拎到神秘寶藏，諗住一心一意為「升職加薪」，咁樣切磋吓絕對唔怕悶親。
玩盡地形頭頂放石
雖然同屬戰棋Game，但對於《機戰》嗰種要消耗大量時間去「清洗」每一關敵人嘅做法，個人較難接受，甚至覺得好浪費時間㖭！其實《FFT》喺戰鬥系統上一樣咁操作，但玩過幾鋪，就覺得分析地形及採取針對性攻擊更需要慎重思考。網友舉咗個例，當敵人身處平原，假如佢隔籬有大屋或小山丘之類嘅地形，不妨迅速移動到該位置，然後攻其無備向佢落石，命中率高不特止，扣嘅HP仲非常厲害，值得試吓！當然地形唔會咁齋，利用L、R及Analog掣，仲可以將地圖當3D扭來扭去，有時會無意中發現寶物㖭！
Profile
機種：PSP
類型：戰棋+RPG
製作：SQUAREENIXCO.LTD
玩家：1人
網上協力/對戰：支援