愛國商人查濟民上月底逝世，對佢嘅家族生意──香港興業嘅運作影響唔大，因為兩個仔查懋聲（圖）、查懋成，一直睇實公司嘅運作，之前大佬查懋聲坐副主席位做老竇副手，細佬查懋成亦係董事總經理，兩兄弟都睇晒集團嘅營運同管理㗎嘞。不過，咁大間企業不能群龍無首，噚日香港興業正式委任查懋聲做主席，查懋成做副主席，正式子承父業。
查氏兄弟當中，論人氣，一向低調嘅大佬查懋聲，最近反而人氣更盛，皆因佢最近以名力集團主席嘅身份，入主亞洲電視，成為該台大股東。至於查懋成，佢人氣本來較高，因為有個做行政會議成員嘅老婆查史美倫。查懋成做得亦玩得，係影相發燒友一名，呢兩年，集團月曆嘅相都由佢操刀，不時上山涉水搵靚景，唔知佢做咗集團副主席後，仲有冇咁好閒情逸致四圍拍。
[email protected]