葉璇憑住嗲功同埋好身材一度十分搶手，有富豪鄭裕彤認做契女，更先後搭上「跳水王子」熊倪同「殼王」陳國強，05年佢同殼王仲俾人偷拍到喺北京夜店癡纏「磨爆」。男人緣一流嘅佢，拍亞視劇集《情陷夜中環2》時搞到是非纏身搶晒鏡，但葉璇終於風光不再，現時佢主力喺內地搵食，早前佢喺佛山夜總會登台，仲俾場內麻甩客抽水。
羅霖乘機攝位
當葉璇好景時，任代言人嘅合約多不勝數，佢曾任代言人嘅美容儀器USBio噚日喺佐敦舉行活動，羅霖同楊受成女兒楊諾思都有出席，該品牌董事譚袁亮珍主動同馮仁昭講，話一早已經唔同葉璇續約，譚太話：「佢形象唔好呀！我搵佢時好多人已經同我講佢形象差，拍劇集時又多是非，我簽咗佢一年啫，約滿咪即刻唔再用佢囉。」
譚太大可搵羅霖做新嘅代言人，喺旁邊嘅羅霖即時攝位話：「如果係搵我就開心啦。」佢隨即大sell身家清白，仲話：「我結咗婚，得閒都係相夫教子，我覺得一個藝人如果形象唔好，真係好影響個品牌嘅。」
另外，羅霖噚日帶埋細仔去中環出席商場活動，佢個仔好搶鏡，叫佢錫媽媽就即刻錫，仲識講Ilove媽媽，連羅霖都話：「呢個仔好有演藝細胞，可能兩個哥哥成日同佢喺屋企影相，唔怕鏡頭，將來話唔定加入娛樂圈㖭。」
