中軟國際噚日公布首季度業績，講起新會計制度下嘅業績表現，公司財務總監霍銘福即刻扯火，佢話新會計制度對業績靚、股價表現好嘅公司就打手板，對業績差股價差嘅公司，反而係一種獎勵。
點解咁講？皆因中軟國際舊年業績所以會由賺變蝕，蝕咗6659.3萬人仔（下同），就係俾新會計制度所害。
話說公司畀策略性投資者微軟睇中，中軟國際05年發咗一批優先股畀微軟呢個大客戶，認購價每股7至8毫，股價自然受到追捧，喺舊年底標升到一個八水平。
不過，新會計制度就將兩者之間個差價當係公司蝕咗錢，條數足足超過1.2億；結果原本純利上升38%，有5472.9萬，最終變成大幅虧損6659.3萬囉。難怪佢咁勞氣啦！