韓星每次出場都會扮到靚一靚，但偶爾都會失手出現醜態。有網友喺內地網站《韓劇社區》裏面，捕捉咗一眾靚仔靚女韓星上電視時最醜樣一刻，仲放上網畀大家欣賞，有啲相片仲懷疑經過「特別加工」，可憐李準基變成老態龍鍾嘅公公，靚女蔡妍仲變成雙下巴肥婆，相信當事人睇到都會嚇一跳。
李準基嘅「瞬間醜樣」，法令紋變得好鬼深，再加埋佢唔覺意嘅扁嘴，一下子變成60歲公公，唔睇佢嘅年輕打扮，仲以為佢係基哥阿爺㖭。至於多次被網友捉到有士啤胎嘅性感女歌手蔡妍，估唔到笑起上嚟變咗雙下巴肥婆，的確有幾分似金亞中喺《醜女大翻身》入面嘅200磅肥妹。
BoA現惡相
尹恩惠笑騎騎時都出現雙下巴，不過冇蔡妍咁嚇人，相反阿Net仲覺得佢係個真性情嘅藝人㖭。至於瑜伽女玉珠鉉嘅雙眼反白，連阿Net都冇眼睇。東方神起嘅Hero在中同Xiah俊秀唱歌太投入，出現瞬間醜樣都值得原諒，但BoA嘅惡女look就真係好恐怖囉。
網友睇過啲相後大讚版主勁有心，網友oprah7027仲話：「事實證明世上沒有真正完美的人」呢句話阿Net都好認同。
韓星瞬間變醜
網址： http://www.kdocn.com/bbs/thread-228890-1-4.html
版主：阿Net
本欄逢周一至六刊出