一向形象男仔頭又玩得癲的何韻詩，昨日在沙田出席ConverseRed活動時，一邊廂指香港性教育做得不夠好，另一邊廂卻自認保守，對於《中大學生報》情色版引起極大迴響，何韻詩指學生寫的內容如人獸交的確是超越了底線。
何韻詩昨日在沙田新城市廣場，出席ConverseRed慈善活動，籌得款項幫助在非洲患上愛滋病的小朋友，她並與現場三名非洲小朋友合作唱歌及打鼓。
阿詩透露剛成立了自己名字的慈善基金，她說：「我前嗰排開生日派對，就籌咗10萬蚊，我都呼籲啲朋友，以後我生日唔使送禮物畀我，折現捐去我嘅慈善基金就得。
醉倒跳彈床
「講開我生日嗰晚玩得好開心，醉咗喺度跳彈床，連我爹哋都跳埋一份，我叫佢年紀咁大咪跳啦，點知佢仲大番我話佢後生時喺學校係體操隊成員。」
問阿詩認為香港推行性教育的成績如何，她說：「我覺得始終做得唔係咁好，啲小朋友好似知啲又唔知啲，連我身邊都有朋友話『唔會咁好彩中嘅，有咗（BB）咪落咗佢囉』。」
「難界定好壞」
提到《中大學生報》情色版引起各方面極大迴響，阿詩自認保守說：「可能我思想真係老土啲啦，言論自由還言論自由，但係有啲嘢係唔應該拎出嚟講嘅，有啲嘢要有底線，好似人獸交呢啲內容就唔應該喺學校刊物討論，因為係好難界定呢個題目係好定壞，校方同學生都應該要有溝通，我個人就覺得呢個話題應該收番啦。」
採訪、攝影：FredaLee
