【本報訊】「真係一個好彩一個唔好彩。架客貨車為咗避開路中心個男人急扭左軚，結果撞正個啱啱踏出馬路嘅女人。架車開得都幾快，撞到個女人成個飛起，好似炮彈咁飛出15米外，直插入路邊的士車底，架客貨車再撞散路旁鐵欄跟住翻埋，直情係好誇張！」一名疑喝下一打啤酒的客貨車司機，前晚深夜駕車在石硤尾涉嫌衝紅燈，將一名準備昨日離港回鄉的雙程證婦撞至命危，目擊者說涉案司機事後被捕。 記者：潘志能、梁澤岡、徐雲庭
被撞至飛起重傷雙程證婦人葉麗珍（44歲），兩年多前女兒與姓劉港人結婚，持雙程證來港與丈夫同住石硤尾白田邨住所。葉婦兩個多月前持雙程證來港探望女兒及女婿，３人同住石硤尾白田邨一單位。
「老婆因為雙程證到期，噚日（前日）先行返回新會續證，外母亦準備今日（昨日）離港，噚晚（前晚）佢離港前親友同佢食飯餞行後，佢獨自返回白田邨我屋企途中出事，我已經叫老婆盡快續證返嚟睇佢阿媽！」當水喉技工的傷者女婿，在醫院憂心忡忡，指外母手術後仍危殆。
意外現場為石硤尾邨美彩樓對開窩仔街與南昌街交界交通燈位。前晚深夜11時許，一部運魚客貨車由姓洪（28歲）男子駕駛，沿窩仔街向白田街方向駛去至現場燈位出事。
「好似炮彈咁飛出15米」
「當時行車燈號亮起紅公仔，有個男人從美彩樓一邊走出橫過馬路。有架客貨車駛到車速都幾快，司機見到個男人喺馬路中心，好似都冇煞掣立即扭左軚閃避。結果係成功避開咗個男人，但可憐啱啱踏出馬路邊嘅女人，就俾架車撞正真係慘囉！」事發時在石硤尾邨大廈平台目擊意外經過女護衞員，憶述事件時為女事主感到難過。
「架客貨車突然扭軚衝埋去，個女人根本嚟唔切反應就俾架車撞到飛起，好似炮彈咁飛出15米外，直插入路邊一部冇人嘅的士車底，個頭攝喺車轆底成個人冇晒反應。」女護衞續表示，客貨車肇事後撞爛路旁2至3米鐵欄其後翻側，撞欄巨響吸引附近居民出來看熱鬧。
救援人員趕至救出的士車底女傷者，客貨車司機自行爬出車外受輕傷，但拒絕入院。他滿面通紅神情呆滯，接受警員呼氣酒精測試，被驗出100毫升呼氣內含150微克酒精，嚴重超標近6倍。
現場消息稱，有人即場承認意外前與友人在旺角一間酒吧飲酒消遣，他在4個多小時內共喝下一打細樽啤酒，駕車至現場交通燈位因為衝紅燈肇禍，客貨車司機被警員拘捕帶署，調查後獲准以一萬元保釋候查。
司機涉醉酒衝燈撞人示意圖
1）客貨車司機出事前與友人曾在酒吧飲酒消遣，他在4個多小時內飲下一打細樽裝啤酒
2）司機涉嫌酒後駕駛及懷疑衝紅燈，駕車扭軚閃避一名正橫過馬路男子，失事衝向左邊路旁
3）客貨車將剛踏出馬路雙程證婦撞倒，她飛彈15米插入路旁一部的士車底，客貨車繼而撞鐵欄翻側
