小妹好少一個人夜麻麻去酒吧蒲，酒能亂性嘛，何況我咁靚女。早幾日旺角朗豪酒店靚女公關Cecilia打電話畀我，話酒店嘅Portal-Work&Play酒吧（圖）喺今日到下月2日，每逢周四至周六晚嘅7點至8點，搖身變成藝墟。
佢話今次搵咗三名本地畫家包括黎明海博士，生於澳洲嘅JohnMcArthur，同埋喺香港定居咗11年嘅AnnWilliams坐鎮酒吧，其中現職教育學院體藝學系副教授嘅黎博士，即場用塑膠彩繪製三聯畫（Triptychs）。佢仲話啲客可以隨便同啲畫家交流吓心得，畀吓意見都得㗎。
吓，酒吧變藝墟咁有諗頭，今晚我都要見識吓，同藝術家打吓交道。Cecilia話，佢哋嘅作品之後會喺酒店展覽，到6月8日至23日喺酒店嘅網頁（www.lphchat.com）拍賣，所有收益撥捐香港保護兒童會。
逢周一至周四刊出