【本報訊】馬力的驚人六四言論令不少人痛心疾首，支聯會主席司徒華昨天炮轟馬力罔顧事實，荒謬言論實是在死者家屬的傷口上灑鹽，侮辱了有良知的人，更質疑對方咬文嚼字否定「屠城」之說，「咁希望佢定出個標準，死幾多人先至叫屠城？」司徒華稱，難明為何民建聯會選他任主席。
司徒華昨天接受電台節目訪問時痛斥馬力言論罔顧事實，指其質疑六四非屠城，便應定出「屠城」的標準。司徒華稱，當時除了天安門廣場有人死傷，長安大街也有很多人被殺，「我從來無聽過圍住個城來殺先叫屠城」。
語文程度低 應該改名
對於馬力質疑是否有燒屍事實，司徒華責其「語文程度太低」：「焚屍唔一定要用焚化爐，以前（歷史）都有焚屍㗎啦；如果講語文，咁馬力都要改名啦，馬力唔係人嚟喎，係講機器幾多匹，咁佢連姓都要改喎。」司徒華續指，「點樣先叫肉餅？係咪要用刀剁碎先係？點解民建聯會選個咁嘅主席出嚟，睇到佢咁低水平？」
司徒華也反駁普選要與六四掛鈎之說法：「咁樣係好荒謬同危險，係咪想將香港變成國內？係咪要所有人跟政府講嘢，嗰時香港先有普選？」
為個人前途 語出驚人
對於馬力在此敏感時刻說出如此驚人言論，司徒華估計，一是因為胡錦濤、溫家寶兩位領導人７月１日來港參與回歸活動，「佢想擦鞋」；二是因為民建聯前主席曾鈺成早前明言不想擔任問責局長，「可能佢想做教育統籌局局長。」
司徒華更相信馬力並非失言，指「失言應該只係一、兩句，無理由失咁多；啲人失禁都係啲咁多啫，唔會失好多㗎。」他認為馬力的言論只反映他敵視民運人士及支聯會。