車仔嚟講，Mini都算經典中嘅經典，全球Fans無數，長玩長有；但另一邊同樣玩細細架、得得意意嘅福士甲蟲車，擁躉數目及熱情一樣唔輸蝕！且聽玩咗甲蟲多年嘅阿紀及Dick一番肺腑之言：「甲蟲唔同Mini，又窄又無冷氣，女仔聽見已掉頭走，媾唔到女仲要成日花錢花時間去整！」咁辛苦為乜？一切只為回憶！
記者：梁佩芬
攝影：陳陶鈞
鍾意整多過儲
香港有好多個甲蟲車會，而阿紀屬「蟲在香港」會長：「會長其實無乜好做，似中央聯絡人多啲，外間有乜活動都會先搵我，大家都方便啲。」以為創會者有幾十架珍藏甲蟲，原來只得架71年款嘅VW1300橙色甲蟲，「買架老爺甲蟲返嚟唔貴，二萬蚊已有交易，執番靚全程唔使四萬。加上甲蟲細細架，每個月五千蚊租嘅倉已放到十幾架，皮費不大。問題是，我鍾意幫人執靚架車多過儲車，所以冇乜珍藏。」
被呃！下決心自學整車
堂堂一個文職公務員，離開冷氣辦公室匿入元朗，又曬又熱又污糟地幹起來。如此辛苦，全因一次受騙經歷！中學畢業後，阿紀開始收集甲蟲精品，原只為貪得意，對型號性能一概不知。後來買了人生首部甲蟲，可惜意外炒了，就找些所謂甲蟲迷修理，點知前前後後竟然整咗大半年、花了五萬，最後一句：「無零件，整唔到。」攞到明上當！
自此，阿紀的起心肝決定自學修理甲蟲，希望透過不同渠道認識真正的「甲蟲迷」，交流整車心得。直到99年，「蟲在香港」成立，而阿紀好多時都義務幫會員整車，只收零件費，可算熱誠十足。但事先聲明，他只是兼職整車，唔好諗住短時間攞得番架車！
甲蟲一樣有凝聚力
成立車會的確認識不少車友，連外國甲蟲迷都有聯絡；02年，他們一行七人到了吉隆坡一會當地甲蟲迷：「400幾架甲蟲聚埋一齊，夠晒壯觀，真係開心到爆！」
有空就整車，會否忽略女友？「我女友本來對甲蟲無興趣，但兩年前看過《鬼馬甲蟲車》後就愛上，可惜她只有自動波牌；最後左搵右搵部自動波甲蟲返嚟畀佢揸，3萬幾有交易，只是殘了些，經我執過後就靚仔番晒啦！」
阿紀開倉晒冷
兩車出世雖只差一年，但卻有幾點大改變，如67年是平玻璃及圓頭燈，而68年則是圓玻璃加平頭燈。
兩年前在街上起火燒毀，阿紀用一年時間維修，家陣行得走得，仲噴上火焰圖案，都唔知攞景定贈興！
呢架1952年出世嘅左軚甲蟲，屬全場最老一架，專程從美國運來，是甲蟲會「鎮蟲」之寶。
阿紀女友的甲蟲，是難得的自動波車，由一名住大埔的鬼佬轉讓，2萬有交易，車牌AW6800又靚，一見即合。
停不了的精品
要數精品珍藏，甲蟲迷毫不輸蝕畀Mini迷，就睇吓呢堆玩意，品種及數量都係咁驚人！
甲蟲是集體回憶
另一位標準甲蟲迷Dick，儲甲蟲只是為回憶，他不愛改裝甲蟲，下雨亦不出車，高危地方如街邊錶位、露天停車場就死都唔泊！如此深愛甲蟲，以為會陪伴終老，但Dick抵死加句：「如果你畀40萬我，六部甲蟲即刻賣畀你！」
現在，他最愛就是被阿紀維修了兩年也未能行多過200米嘅70年款VW1300開篷甲蟲，將本身是綠色噴成似消防車嘅紅色。Dick相信再過一年，便可在街上招搖過市！
我也感受到此等深情，因為我就曾經喺南美嘅秘魯度，看過整條街都泊滿甲蟲，紅橙黃綠青藍白黑灰都有，嗰刻令我對甲蟲印象相當深刻。阿紀、Dick及各甲蟲迷，有機會一定要看看！
以前阿爸都係揸甲蟲，但只知架車好高，幾得意！但我一開始都不是玩甲蟲，玩MINI同Benz都有！到五年前，突然懷念甲蟲車，不知不覺又儲了6架！
你睇阿紀，上年成日揸架VW1300，好傷啫！但係今年又不想揸，有時又撻唔着，咪就係少咗同架車傾偈囉！
緣來希魔
上世紀30年代，希特勒下令保時捷的設計大師FerdinandPorsche，在福士車廠生產甲蟲車。至1978年1月，西德宣布只剩下墨西哥及巴西繼續生產甲蟲，最後捱到2000年才全面停產，產量近2,046萬架，可算同一車系中賣得最多！