馮仁昭四圍超：
演黃蓋食赤壁回頭草？　發哥：冇收到通知 - 馮仁昭

吳宇森部《赤壁》真係戲外精采過戲內，初時男主角梁朝偉同周潤發先後辭演，然後偉仔食回頭草演周瑜一角，噚日又有報道話發哥都口頭答應回劇組客串演出黃蓋一角，同偉仔會演三日對手戲，算係藉今次客串嚟破冰，挽回佢同吳宇森嘅20年情誼。

監製斷然否認

不過呢部戲嘅監製張家振俾記者問到呢件事時，佢一口就否認有咁嘅事。而身在美國宣傳新片《加勒比海盜：魔盜王終極之戰》（PiratesoftheCaribbean：AtWorld'sEnd）嘅發哥，似乎對呢單報道覺得莫名其妙，佢透過助手話：「我哋完全冇收到通知，所以對呢個報道冇乜嘢可以回應。」喺美國宣傳完，發哥會同尊尼狄普（JohnnyDepp）轉飛日本出席《魔》片喺日本嘅首映。