前日港股裂口高開591點，全日升咗511點，成交額近950億元創新高，網友HK0030當日未開市就喺《香港討論區》牙擦擦咁話：「今日一開市，我身家就多咗18萬，有冇兄弟比我賺得仲多吖！」
佢仲話自己全職炒股，冇做嘢超過1年，手上揸嘅股票都係藍籌、銀行保險股、石油股同礦產資源股，例如中石化（386），江西銅業（358）、中移動（941）、中國人壽（2628）同中國財險（2328）等。Andeon就好羨慕咁話：「你竟然賺得咁勁，我嘅身家都只喺多咗1萬蚊左右，有一半以上係嚟自江西銅。」
將軍澳燈王就話，喺收市之後埋單計數，唔計IPO嘅碎股，賬面賺咗17.8萬；另一位網友狄青，就話自己賺咗12.35萬。但Yuenlin就冇咁好彩，因為佢好多貨都喺高位入，「好想喊呀！嗰市升得咁犀利，但我啲股票賬面𠵱家都仲蝕緊、坐緊艇，好似工行、湖南有色（2626）同中信銀行（998），都分別喺高位$4.8、$5.2同$6.6個價度入，真淒慘！」