打車Game個個都幻想自己係翻生文太或拓海！不過喺PS3新出嘅美版《MotorStorm》，大家嘅「技術」就完全無用武之地；激戰越野賽道、OFFROAD只有起點、終點並冇指定賽道，或者你會問：「咁佢打乜？」答案係打人！大泥頭喪撞兩個轆電單車落街、大拖頭將成架跑車炒起，你嘅目標就係唔想見到對手過終點，咁你咪第一囉！
記者：許福合
攝影：陳偉強
越野賽無限制撞車
一開Game，感覺已經同港人打開《GT》嘅感覺好唔同！《MotorStorm》主要賽場都設於越野環境，所以車種方面你唔會搵到一架係名牌跑車，取而代之係專跑野外環境嘅越野電單車、越野沙灘車、越野賽車及競速卡車等車系！
可能近年《頭文字D》嘅影響，賽車Game不成文地變為窄路彎道賽！久而久之變成彎道記位遊戲；《MotorStorm》就一反呢個傳統，秉承越野車「路係自己行出嚟」嘅理念，凹凸崎嶇嘅山路基本闊到任你行，不過對戰策略係盡量炒起人哋架車，令敵車過唔到終點，咁自己就可以最快衝線攞第一！
720p靚畫泥路賽感強
喺上年AGS遊戲展上，《MotorStorm》亦出過試玩，正式版比較之下靚咗好多，雖然畫面只係720p，不過畫面細緻度已經非常高，賽車走過地面都會有唔同變化，而喺野外賽車，當然唔少得泥濘飛濺嘅場面，最正係有時連屏幕都會沾上沙塵，如果用第一身視角玩，真實感就更強！《MotorStorm》可以支援線上最多12人對戰，而單機玩法雖然只能作單人賽，不過唔好睇小電腦車，AI非常強，揸得快同時更會諗計阻你撞你，完全無「人性」，比真人對手可能仲難應付。
機迷實試
選擇唔同車型，所需要戰略同技術，都大為不同，電單車點同大貨頭對撞？係咪一定「蝕桌」？搵嚟幾個Gamer作試賽，點知竟然俾架越野電單車爆冷跑第1，點解會咁？即睇！
拖頭文 撞石自爆慘敗
呢類美式變態Game，都估佢對「大嚿」車種設定會高啲！揸架拖頭出嚟簡直好似成架坦克咁打橫行，見人撞人見車撞車，勁High！不過拖頭唯一缺點係靈活度唔高，我就係「專心」撞人，點知自己炒埋山度，咁就自爆離場。
女鐵騎Ruby 第1名過終點
最叻踢人落車
電單車輕裝便驥，可以專走刁鑽小路！以速攻為目標，盡量避開啲四個轆；如果唔好彩遇到大車，俾人撞到飛起可以話家常便飯，不過我反覺得好好笑；但遊戲平衡上，電單車係可以用腳踢對方，好彩嘅話甚至可以踢對手司機出車外，勁爆笑！
越野車炒王Jaim 中型車好蝕呀！
穩陣派！諗住揸四個轆嘅中型越野車會又撞得又跑得，點知冇電單車嗰種靈活走小路，遇到大車又俾人追到冇得走，真係上天入地無門，真係幾絕望吓；可以話係一種技術型車種！試打中我就係第一架車俾人炒到變廢鐵GameOver出場嘅人。
沙灘車神Ken 遊車河攞第2！
我都冇諗住贏㗎！揸架沙灘車出嚟諗住遊車河，咁反而俾我留意到，開跑後畫面連場出現沙塵滾滾場面，真係好有真實感，另外美式Rock味配樂都好正，同遊戲都好合襯；點知前面幾架車無端端炒晒，咁就俾我遊遊吓攞第2，Lucky！
Profile
主機：PS3
廠商：SonyComputerEntertainmentInc.
種類：賽車
人數：1人
售價$388
