多得《溏心風暴》帶挈，楊怡兩星期內出席的宣傳活動裏鋸勻3、4、16頭鮑；𠵱家越食越嘴刁，仲話想餐餐都食，咁就最好自己識煮啦！不過整碟排骨都冇味嘅佢，點識煮鮑魚吖？一如求教於酒店大廚，話晒身為唐家媳婦，將來點都要幫手打理吓海味舖，識得煮當然更Perfect喇！
記者：趙珮倩
攝影：譚盈傑
服裝提供：MissSixty
髮型：ILColpo
化妝：MarshaMa
示範：海景嘉福酒店（27215161）
中菜總廚梁輝雄
鮑脯麒麟豆腐
需時：10分鐘（不計煲鮑魚時間）
價錢：$250/4人
材料：南非罐頭鮑魚6片、布包豆腐2件、金華火腿6片、菜心4條、雞湯1/2杯、蠔油1湯匙、糖1/2茶匙、老抽/生粉水各少許
做法：先將鮑魚原罐煲至少4小時，時間越長，鮑魚越腍；豆腐切片，鋪上鮑魚片/金華火腿，蒸5分鐘；以雞湯/蠔油/糖/老抽/生粉水埋芡，淋上鮑片面，菜心烚熟伴碟即成。
燕翅斑肉卷
需時：15分鐘
價錢：$160/4人
材料：東星斑6両、魚翅（已發）3両、燕窩碎（已發）11/2両、甘笋絲/金華火腿茸/糖/胡椒粉/麻油各少許、雞湯1/2杯、鹽1/3茶匙、生粉1茶匙
做法：斑肉切薄片備用；魚翅煲滾後撈起，下鹽/糖/生粉/麻油炒至亁身；用斑肉捲入魚翅，以甘笋絲綁好（不要紮得太緊），蒸3分鐘；煮滾雞湯，下鹽/糖/生粉埋芡，加入燕窩/胡椒粉/麻油煮勻，淋上斑肉卷，最後撒上金華火腿茸。
鮑汁原條百花釀遼參
需時：20分鐘
價錢：$60/2人
材料：遼參2條（已發）、蝦仁3両、小棠菜2條、薑/葱/粟粉/糖/老抽/麻油各少許、鹽/生粉/蠔油各1/2茶匙、雞湯1/2杯
做法：遼參洗淨，加薑/葱滾5分鐘，瀝水拍上粟粉備用；將蝦仁拍爛，加入鹽/生粉打至起膠，釀入遼參，蒸5分鐘；以蠔油/雞湯/糖/老抽/麻油埋琉璃芡，淋上遼參面，小棠菜灼熟伴碟即成。
魚肚雲耳勝瓜
需時：20分鐘
價錢：$40/3人
材料：勝瓜1/2條、魚肚1條（已發）、雲耳3塊（已浸軟）、蒜頭6粒、瑤柱2粒（已浸軟）、薑2片、花雕酒1茶匙、雞湯1杯、
調味料：鹽1/2茶匙、雞粉/糖/胡椒粉/麻油各少許
做法：先將瑤柱蒸腍備用；燒熱滾油熄火，將蒜頭浸透約4分鐘，撈起備用；爆香薑，灒花雕酒/雞湯煮滾，放入所有材料煮5分鐘，最後下調味料即成。
後記：阿怡漏口風
《溏心風暴》大受歡迎，連酒店PR一見到楊怡都連忙追問劇情，阿怡亦漏少少口風：「我係好人會有好結局，不過我個衰大佬、阿媽遲啲就會夾埋細契同唐家爭產……」總之好戲在後頭，包你繼續睇到咬牙切齒！