前日恒指喺QDII放寬投資範圍，准買港股嘅利好消息刺激下，狂升500幾點；但同日晚上，鄭少秋主持嘅《謎》正式出街，「秋官效應」即時見功，恒指噚日上升動力即刻冇晒，掉頭反插111點。網友鄙人喺《香港討論區》形容呢幾日港股嘅表現，簡直係一場秋官決戰QDII嘅好戲。
激烈戰況 即時上映
前日南軍秋官同北軍QDII爆發激戰，秋官先嚟一招詐敗、先輸一仗，退避500里，等北軍QDII以為勝券在握。
噚日朝早，QDII再嚟一輪大肆進攻，深入南軍敵陣100里，諗住乘勝追擊。點知蠱惑嘅秋官早有部署，老早就聯絡好火器部隊，叫人火燒天安門嘅毛像，大破北軍QDII嘅風水陣，令QDII主帥上海A將軍發生內亂。
𠵱家，秋官已經將前日嘅900億大軍，圍困於20900點山頭，只要秋官一聲令下，QDII部隊隨時都會被圍剿，落得全軍覆沒收場。
欲知後事 下回分解
究竟秋官有冇能力剿減北軍QDII，就要睇佢喺《謎》嘅播放期間，仲有冇其他蠱惑招喇！
網友hkils2001就認為，「唔好唔信邪，家陣位處風眼，都係避避風頭，等秋官做完套戲，先至好再做買賣。」
報料站
歡迎提供網上財經趣聞，資料一經採用，酬100元。
請附姓名、電話及電郵地址，交[email protected]