親愛的茱麗葉，我唔係想刻意「隱門」，我都係迫於無奈，你知喇，我係一個「愛快」嘅「羅密歐」，喺一般世俗人嘅眼裏面，「快」同「雙門跑車」經已畫上咗等號，如果畀人知道我實質係四門而唔係雙門嘅話，我愛快呢個形象就會蕩然無存，所以我一定要將後座車門嘅門柄隱藏住，等人以為我仍然係架雙門車。茱麗葉，我好希望你可以原諒我「隱門」，至多第日飲茶灌水我嘅！
記者：周達之
攝影：陳偉強
模特兒：Joey
點解要「隱門」？
一眼望落呢部Alfa147Facelift2007，真係差啲以為係雙門跑車，皆因驟眼望落去佢只係得前座車門有門柄，但再望真啲，原來後座門柄擺咗喺C柱前面，仲要加埋「保護色」與C柱混成一體，好明顯係特登「隱門」，令佢保持番雙門跑車嘅不羈造型，真係虧佢諗得出。
新款147嘅造型畀人一種好簡潔嘅感覺，而流線型嘅設計務求令風阻減到最低，三角形鬼面罩仍然係愛快嘅標誌，加埋個酷似古代皇族嘅徽章，AlfaRomeo一直流傳落嚟嘅浪漫情懷真係一時間好難搣得甩，而車迷對佢雙門跑車嘅印象亦十分深刻，難怪廠方即使要推出四門車，仍然要刻意搞到好似雙門咁嘅款，為嘅都係唔想破壞Alfa一貫嘅浪漫形象。
浪漫滿車
既然浪漫係Alfa嘅形象，所以今次試嘅呢架147，內櫳都一樣咁浪漫；就以中控台為例，好多車碼都有個LCD顯示吓資料，但浪漫嘅147居然夠膽齋裝個杯座上去，唔通真係有情飲水飽？其他浪漫裝置當然唔少得睇月光嘅天窗，而代表心心相印嘅紅色座椅亦係Sharp得嚟好順眼，其他牌子嘅車用紅色座椅會覺得好突兀，但Alfa係兩個例外嘅其中一個（另一個係法拉利）。軚盤上嘅Audio控制按鈕亦係為方便情侶聽冧歌而設，情到濃時你可以隨即校大聲啲首冧歌嚟襯底，感覺就好似愛情片到劇情高潮時響起BackgroundMusic一樣，若然閣下再整番個權相佑眼神，坐你隔籬嗰個想唔冧爆都幾難！
無想像中咁斯文
之前試過全跑格嘅AlfaBrera3.2JTS，260匹直路夠辣，片彎既快且狠。今次呢部147初時仲以為佢會斯文啲，但點知片起上嚟一樣咁辣，雖然由於懸掛偏向舒適軟性，喺運動性上無前者咁優秀，但整體上仍然令人盡興。波箱採用棍波式機械原理設計、自動波式操控，即係147會自動幫你控制極力子，呢種設計比一般自動波嘅好處係能減少動力流失，好力得嚟慳油，耗油量官方數字係8.9L/100km。小記試車當日覺得無論係用自動定+/-波，換檔嗰陣都一樣係咁順暢，值得一讚。
蘋車會
覺得佢無想像中咁辣，不過話晒147唔係Sell跑格，所以都情有可原，若當佢四門房車看待，舒適性同運動性都叫水準以上。
真係好鬼鍾意Alfa個獵鷹鬼面罩，新版147平衡到雙門跑車同四門房車嘅優點，辣跑得嚟亦唔會「趕絕外母」，出入後座不再辛苦，抵讚！
新車速蘋
．「隱門」設計保留雙門跑車風味
．外形一貫愛快式浪漫
．內櫳設備簡約無乜嘢玩
．換檔順暢幾好跑
引擎：1,970c.c.直4TwinSpark
馬力：150hp/6,300rpm
扭力：181Nm/3,800rpm
傳動：5前速半自動波，前輪驅動
尺碼：4,223×1,729×1,442mm
重量：1,250kg
車輛提供：AutoSportivaLimited（28778788）
