「病假？一年醫生開咁多病假紙，張張都換到一日假，香港停咗落嚟啦！」回歸十年，本港打工仔普遍的工作時間長了，人工卻幾經凍薪和減薪後，只有零星的增幅，還要受氣，聽老闆的「說話」。有網友近日在高登討論蒐集「老細戇居金句」，沒料到反應熱烈，觸發逾百網友回應，宣洩對苛刻老闆的不滿。
「蛇王都要蛇得好好睇睇，俾我睇到你蛇王唔緊要，最緊要好好睇睇，唔好俾我捉到就得！」「成日掛住食飯，食遲一陣會死咩？但當你遲咗出去食，遲咗返嚟時，佢就會話：食飯使唔使食咁耐呀？」對於老細的「戇居金句」，網友的記性出奇地好。其中阿德說：「幫幫手，大家一家人嘛！叫我哋無條件為佢OT。」
Pandaman說，佢老細最鍾意講，「一味識得做，新界隻牛夠勤力啦，咪又係要俾人劏？」有網友續稱：「做嘢最緊要用腦，無腦？同牛有乜分別？但用腦都要識食腦，淨係識用腦唔得㗎，同牛有乜分別？」wonggap補充指出「但食腦都要食得啱，淨係食錯咗？咁同牛有乜分別？但食得啱都要食得靚．淨係食唔靚？咁同牛有乜分別？」真心交朋友歎氣說：「勤力又死，懶又死！」
當眾人身攻擊
另一網友說：「你哋啲嘢小兒科啦！之前我公司有個女仔，我哋成班開會，老細問個女仔之前叫佢做啲嘢搞成點，個女仔因某啲原因未做起，老細就用好平常嘅語氣講，『你已經唔係靚㗎啦，你做啲嘢可唔可以漂亮少少？』結果，個女仔當場落淚……」
網上老細金句
‧「今日咁好生意，食住個氣勢做夜啲。」
‧「今日唔好生意，勤力啲做夜啲。」
‧「唔使樣樣嘢都要問過我下話？（轉頭）點解決定之前，你唔問過我先？」
‧「你可唔可以當公司係自己生意咁去搏？」
‧「公司重要定朋友重要？」
‧「唔急，十分鐘後等住要。」
‧「又開唔到單？成條街都係人，做咩開唔到單？」
‧「有咩唔高興一定要講我知」
‧「你返工，OT（超時工作）係應該嘅！」
‧「邊個出糧畀你？諗公司都唔好諗你老竇老母！」
‧「返工早到係對職業嘅一種尊重。」
《蘋果》網聞版請你報料！大家無論在網上網外發現任何騎呢搞笑的事情，都歡迎提供照片或短片資料。
一經採用可獲酬100元
請附姓名、電話及電郵地址，電郵到：[email protected]