拍完電影《霍元甲》後，李連杰話唔想再拍動作片，但佢個功夫巨星形象實在太深入民心，戲路豈能話轉就轉？上年佢就同舒淇拍過《玩命快遞》（TheTransporter）嘅英國打星積遜史廸咸（JasonStatham）合作演出荷李活動作片《War》，齣戲9月喺美國上映，預告片日前率先曝光。
今次李連杰擔正做主角，但就飾演一名歹角殺手，周旋喺中國同日本黑道之間，有次佢將一名FBI探員全家滅口，原來呢個人正係積遜史廸咸個拍檔，積遜奉命捉拿李連杰兼為拍檔報仇。至於其他演員，有我哋熟識嘅港星鄭浩南，仲有日裔名模青木廸芳，動作指導就係同積遜及李連杰合作多次嘅元奎。
鄭浩南扮惡人
雖然卡士OK，不過睇條預告片，發現啲場面熟口熟面，阿Net覺得係《喋血雙雄》同《暗戰》嘅大兜亂，再加埋亞洲黑幫、港式槍戰同功夫場面，又有鄭浩南扮惡人，感覺真係同港產片無異。香港觀眾睇厭唔緊要，最緊要係外國人啱睇。
網址： http://www.kino-govno.com/?trailers&id=war
版主：阿Net
本欄逢周一至六刊出