鍾欣桐、泳兒同埋譚俊彥等最近拍咗套新戲《地獄第19層》，前晚喺銅鑼灣一間酒家舉行煞科宴，久違嘅吳剛師傅都在場，原來佢係間酒樓嘅執行董事，𠵱家全力進軍飲食業，吳剛話：「𠵱家飲食業好hit㗎，我都係學習階段，做咗半年左右啦，一間酒樓要投資七位數㗎，算係第一步，我睇好呢行嘅發展前景。」
勤練功怕變肥佬
吳剛𠵱家係兩間酒樓嘅執行董事，問佢係咪唔會再幫手做東華籌款表演，佢話：「慈善嘅嘢，有時間一定做，TVB都有搵我，上年東華有傾我演出，我對佢哋有深厚感情㗎。」問佢點解最終冇參與表演，吳剛冇答，只係話：「我仲有練功㗎，做飲食業唔練就變肥佬啦。」馮仁昭都幾想再見到佢搽到成身油食炭㗎。
阿嬌透露兩年前爺爺過身時許咗個願，同時食齋一個月，結果願望達成，後來佢冇時間拜爺爺，就一直食齋食到𠵱家，但每個月有兩日食番肉，仲輕咗好多㖭。此外，阿嬌噚日喺尖沙嘴出席宣傳活動，講起前緋聞男友陳冠希（Edison）踢的士門被判守行為，阿嬌都寸Edison：「其實呢啲事唔應該做，無論係唔係藝人身份都應該循規蹈矩，要有禮貌，你點對人人點對你。」然後又同Edison劃清界線，話同佢唔係好熟，當時只係同事。
