食鵝肝梗係用刀叉切嚟食，今次用筷子夾起食原來另有一番風味，將西方鵝肝加中式花雕，搞東又搞西後先知更滑溜，夾起時要特別小心，因為太滑好易跌呀！其實中菜西煮或西菜中煮玩創意，務求食客能食出新味道。今次亮明居就玩四川菜Crossover，搵埋四川師傅主理，又是一次EastMeetsWest新體驗。
記者：梁學文
攝影：陳陶鈞
Model：Hibernia
川菜唔係得個辣字
川菜向來給人辣的形象，麻辣火鍋、水煮魚或水煮牛，受歡迎的川菜統統都是辣到飛起，所以一提四川菜，大多數人都會話好辣而避之則吉。邵德龍師傅一路搖頭一路話，「錯晒！川菜一啲都唔辣，只係一般人對川菜嘅誤解，唔係因為我食得辣，而係只有兩成左右嘅菜式係辣，其餘都係唔辣。」出生於四川重慶的邵師傅，一直醉心鑽研家鄉四川的飲食文化及烹調技巧，16歲就開始煮川菜，擁有20幾年經驗，對川菜有深入的認識。
材料來自四川及法國
邵師傅想將川菜的文化同味道提升至另一層次，於是利用四川的香料和材料，結合西式的食材，創製出新一代的川菜，他說靈感源自生活：「生活上每個細節都會啓發到我，好似今次推出嘅豆漿海鮮湯，就係有日我食早餐見到碗豆漿，於是諗到加入西式忌廉。」師傅話菌類最適合跟西菜一齊煮，味道更相得益彰。
東：花雕＋西：鵝肝
（左）香辣兔丁
（中）話梅茄甫
（右）花雕酒浸鵝肝
用上等紹興花雕生浸法國鵝肝，再加用花雕做的啫喱，做法似醉鵝肝。鵝肝加入了花雕，更感軟滑，味更濃。而茄甫是番茄加話梅茸，這道菜甜甜酸酸好開胃。香辣兔丁是用歐洲的兔腿肉加西芹、青瓜、花生及鮮辣椒，再加秘製辣汁做成，就算唔食得辣都要試吓！
東：豆漿＋西：忌廉
香滑海鮮豆漿湯
豆漿加入牛奶同忌廉做湯，入口豆漿味道好重勁Creamy，邊飲湯邊食油炸鬼，口感夠特別，再配合象拔蚌同蝦，香滑之餘又帶點鮮味。
東：野菌XO醬＋西：鴨胸
煎丁香鴨胸配野菌醬及砵酒汁
將法國鴨胸煎香至6成熟，塗上蜜糖再淋甜砵酒汁。重點是秘製的野菌醬，師傅選用來自四川的7種野菌做出野菌XO醬，入口辣辣哋又引出鴨胸味道。不得不提的是伴在鴨胸旁的飯糰，不單飯粒有咬口，飯裏還有瓜子仁同提子亁等。
野菌醬由7款鮮菌製成，其中最特別的3款是：
（左）雞樅菌有種特別的野菌香味。
（中）虎掌菇味道濃烈，有種霸王感覺。
（右）松茸菇味道最清香，價錢最貴。
東：魚丸＋西：南瓜茸羮
（前）鮮刁草金湯燴青魚丸
（後）清湯芝麻麵
以新鮮刁草、蟹黃及以青魚肉打成魚丸，跟廣東或者潮州式魚丸的爽口唔同，入口較軟滑，伴以南瓜茸煮成之湯羮，味道略甜。而清湯芝麻麵味道幾似公仔麵，不過更加彈牙爽口。
東：燕窩湯圓＋西：忌廉脆餅
薑茶雨花石燕窩湯圓配榛子忌廉薄脆餅
用熱薑茶配燕窩湯圓，一定要趁熱食，湯圓面的雨花石花紋是以甘笋汁、菠菜汁及可可製成，賣相夠靚。而榛子餅夠鬆化，多層設計似千層糕。
亮明居（23933933）
地址：中環國際金融中心商場3樓3101號
營業時間：12nn-3pm、7pm-11pm
座位：160個
6道菜新派川菜精選餐單$520/位
