大契李司棋是《溏心風暴》中的靈魂人物，也是公認劇中最好戲的演員，可惜她今晚將離開《溏心》。大契死後，會否影響《溏心》對觀眾的吸引力？本報就此進行街訪，詢問觀眾意見。
羅小姐：「都仲有吸引力，我都會再追睇，好似話之後黃宗澤都會變壞人，我都想睇吓會壞成點，如果大契唔死就冇嘢睇喇，之後要講佢哋爭家產，個劇情都仲好吸引。我本身都鍾意睇啲女人爭嚟爭去嘅戲，所以都覺得套劇都幾好。」
李小姐：「都會再追落去，咁可以睇佢哋點樣爭家產，我都有睇開雜誌，都有唔同版本（嘅結局），所以好想睇個結局係點。關菊英咁奸，李司棋明明冇講過嘅嘢佢都可以照講，都想睇吓佢會有乜唔好嘅下場。」
陳太：「我一直追開，覺得司棋姐死咗都仲有吸引力，個劇情睇落會好緊張。自己好鍾意睇呢類劇集，而且關菊英咁衰，係人都想知佢最後會有咩唔好下場，加上之後好似話會爭家產，應該都會幾緊張好睇。」
