碧桂園上個月20號上市，帶挈股民賺唔少，主席楊國強將全部股份送晒畀二千金楊惠妍，令25歲嘅寶貝女登上全國女首富寶座，成為一時佳話。農夫出身嘅楊國強成為富豪後冇忘本，「隱形」資助咗4000名國內青年，助學近十年。順德富豪咁肯幫人，原來係受到偶像同寶貝女影響。
內地報章《新快報》早前訪問順德富豪，佢嗰代嘅人通常崇拜毛澤東，但楊國強就崇拜唔同嘅偶像，分別係日本電器之父松下幸之助、新加坡內閣資政兼前總理李光耀、愛國華橋兼廈門同胞陳嘉庚，同埋諾貝爾和平獎得主德蘭修女，個個都熱心助人，為國家、為人類奉獻，發揮無私精神，造福人群。楊國強不諱言：「只有對社會好，社會才會對你好」。
近身錢不如親生女
佢仲自爆學習李光耀，嘗試用自己嘅智慧經營事業。事實證明，碧桂園一上市，就成為本港市值最大嘅內地房產股，楊國強當然有自己一套先成事啦！
對於點解大嗱嗱幾百億身家，咁早就送晒畀個女，楊國強好坦白咁話，因為個女乖囉，仲話「親生仔不如近身錢」完全套用唔到喺楊家。佢大讚個女心地善良，5年前鼓勵佢去辦免費學校，凡係對國家、對社會有好處嘅善事，要嘭嘭聲搞掂佢。佢覺得個女對待外人都咁好，冇理由唔養佢吖，所以兩年前就將公司全部股份送晒畀個女喇，仲大讚個女又叻又聰明……真係有女萬事足。
雖然有個咁乖嘅女做接班人，但佢話自己仲後生，唔會咁快退休。老竇楊國強咁熱心公益，唔知身家超過700億嘅楊惠妍又會點樣回饋社會呢？
[email protected]