大契能剋細契，卻敵不過癌魔。李司棋在《溏心風暴》飾演的大契凌巧，極受家庭觀眾歡迎，可惜她在今晚播出的第28集中病逝，從此告別《溏心》，她死前還向飾演細契兒子的黎諾懿說了一句遺言，黎卻謊稱大契已原諒細契，令細契有機重返唐家爭產，相信定會讓觀眾激氣得咬牙切齒。
李司棋在人氣劇集《溏心風暴》中飾演的大契凌巧，深受觀眾歡迎，可惜她在今晚播出的一集中會因肝癌病逝，大契在臨終前回家度過最後的時光，與家人細說往事及打麻雀，細鮑（陳豪飾）刻意鬆章給大契食清一色八番，大契又刻意鬆章給細女欣欣（陳法拉飾），此時，大契終支持不住暈倒送院。
細契求饒
阿歡扭曲大契遺言
家人逐一向大契道別，細契（關菊英飾）也趕往醫院跪地求大契原諒，望能藉此回唐家坐正，她七情上面說：「我知錯，對唔住，阿姐你千祈唔好帶呢啖怨氣走啊！」阿歡（黎諾懿飾）幫忙求情，大契搖着頭用最後一口氣，在阿歡耳邊說了一句遺言，阿歡聽後神情錯愕，後竟說謊對細契說：「大媽話已經原諒你喇，媽咪！」大契真正遺言要於日後揭曉。但本報昨得悉大契遺言其實是說：「大家永遠做朋友。」即不願意與細契做親戚，死也不願細契重返唐家。
隨着大契病逝，臨別秋波的司棋姐前晚到尖沙嘴兩間有播放《溏》劇的茶餐廳，與觀眾交流，視察反應兼陪街坊睇電視。司棋姐首先到尖沙嘴緬甸台一家燒味茶餐廳，適逢當時正開始播放《溏心》，fans們顧着看戲又想親近司棋姐，十分忙碌。餐廳老闆更抱着BB要求合照，其中一位師奶fans對司棋姐說：「你做大契做得好好睇呀，好正呀，我哋晚晚追，我個仔都睇，佢仲睇到話要打阿琴（關菊英飾的細契）呀。」司棋姐聞言笑說：「多謝支持，戲裏面梗係要有好人同壞人啦，啲細路仔都係講吓啫。」
後來司棋姐再到阿士厘道一間茶餐廳，食客看到她均十分驚喜，餐廳員工們更放低工作索簽名，並對司棋姐說：「我哋平時都偷懶睇你套劇㗎，老闆都唔會鬧。」收銀阿姐更趁機拿出電話，要求司棋姐為她說出大契怒罵Jackie（楊怡）難教的對白：「點解你咁難教，就算我幾想教好你，我都恐怕自己唔夠時間喇。」即席錄製用作電話鈴聲，司棋姐聞言建議說：「𠵱家啲人鍾意用『係人係鬼我睇得出』嗰段喎。」誰知收銀阿姐謂她早已有該段對白的電話鈴聲，還馬上播出，引得司棋姐笑逐顏開，於是她便說出鬧Jackie一段對白，聲音與拍劇時的如出一轍，現場眾人皆大讚她好戲。
奸人可憎
勸關菊英咪出街
司棋姐認為觀眾如此受落大契這個角色是意外收穫，她說：「啲觀眾對我咁nice，得到大家愛護，真係好安慰，好彩我個角色唔乞人憎咋。」司棋姐笑謂會勸細契關菊英不要出街看電視，她說：「我係佢就會避忌吓，其實𠵱家都少咗啲奸角俾人鬧啦，以前石堅同李香琴，真係出街俾人喊打㗎。」
此外，無綫昨公布《溏心》收視穩步上揚，前日最高收視有33點，約214萬人次收看；新劇《師奶兵團》第一集收視高開，平均32點，約207萬人次收看，最高33點，約214萬人次收看；成績最好的要數由鄭少秋和王貽興主持的《謎》，比上周同時段播映的《一生為奴》高8點，有26點收視，約169萬人次收看。
採訪：王崇穎、胡比、楊潔雯 攝影：陳慧安
大契病逝逐格睇
話你知：大契金句夭心夭肺
《溏心風暴》自播映以來，大契李司棋的金句一直是劇集焦點所在，而且句句精警到肉。
大家喺前門捉賊，你哋就喺後欄放火！
我話係就係，唔使證據！呢度唔係法庭，唔需要證據，我對眼就係證據！
點解你咁難教，就算我幾想教好你，我都恐怕自己唔夠時間喇！
我睇人睇咗幾十年，邊個係人，邊個係鬼我睇得到！
未登天子位，先置殺人刀！
資料來源：《溏心風暴》
最高蘋嬸
借講波佬黃興桂嘅金句，睇大契真係有今晚冇來世，大契今晚死，相信收視都爆晒燈，但我希望可以改劇本，加番啲大契回魂戲份，fans咪高興囉。
