【本報訊】六四事件18周年紀念前夕，民建聯主席馬力突然表態力撐北京，否定六四屠城之說，「否則嗰四千人（學生）應該死晒」。他又稱，不相信當日天安門曾經燒屍、否認坦克車壓死人變肉餅，更叫人「咁咪搵隻豬去試吓係咪會變肉餅囉！」 記者：許偉賢、莫劍弦
馬力的言論引起曾經歷八九年六四屠城的一眾支聯會成員震怒和批評，直斥馬力「冷血」、「冇人性」，對一眾天安門無辜死難者及家屬不敬。他們表明，若馬力敢在下周立法會六四辯論公開再講這番話，支聯會必定全力反擊，為死難者討回公道。
馬力昨天與記者茶敍，原本是談政改方案，可是當他提及香港國民教育不足時話鋒一轉，大談他對六四事件的看法。他認為本港學生應該熟習中國歷史，就算近代的六四事件，也要包括在課程之內，有關教材尤其要澄清，六四事件不如外人所說那樣是中央屠城。
「如屠城學生應死晒」
馬力解釋，屠城有刻意殺人之意，「揸住支槍周圍射就係刻意殺人」，但馬力強調：「如果係屠城，呢條友（學運領袖柴玲）第一個殺咗佢啦；嗰晚嗰四個人（學運領袖柴玲、封從德、侯德建同吾爾開希）都可以慢慢咁離開。如果要屠城，嗰四千人（學生）應該死晒」，堅持中央沒有刻意清場殺人。
馬力又質疑天安門曾經燒屍的說法，「乜嘢叫天安門燒屍？唔通就咁就可以喺天安門燒屍？如果喺咁啲焚化爐就唔使排咁耐。」他又質疑有人指坦克車壓到人變肉餅，「咁咪搵隻豬去試吓係咪會變肉餅囉！」
馬力強調：「我從來冇話六四冇死過人，只係覺得唔係屠城。」他揚言，只希望外界要基於事實作出評論，「唔好將局部嘅嘢當成全部」；論述六四事件時，「要講明當時評論係點，𠵱家嘅評論又係點，唔好只係引述海外人士嘅說法，等大家可以交流討論一吓，當然唔好只係攞屋企有人死咗嘅人嚟講，佢哋梗係覺得唔啱。」
遭怒斥對死難者不敬
馬力在立法會辯論六四事件前，一改以往左派迴避態度，公開否定北京屠城，令一眾支聯會、民主派立法會議員嘩然和憤怒。八九年六四屠城時身處北京、因支援學生遭北京拘禁的支聯會副主席李卓人，直斥馬力「冇人性、冷血」，「成日淨係學袁木（當年國務院發言人）咁，係咁拗廣場冇死人，咁喺大街開槍打死咁多北京市民，咁多人睇到，咁都唔算屠城？」他指當年屠城部隊由長安大街開入天安門廣場時，已不斷向沿途阻攔他們的北京市民開槍，以坦克壓死、壓傷不少阻攔的北京市民。他問：「喺長安大街向住群眾開槍，咁都仲唔算屠城？」
李卓人指出，若馬力堅持六四不是屠城，沒有濫殺平民，根本對六四無辜死難者不敬，應向子女遭解放軍殺死的天安門母親道歉。「叫佢問吓丁子霖、問吓『天安門母親』一班死難者家屬，係咪對得住佢哋。」
立法會下周三將會就六四進行動議辯論，李卓人說，若馬力屆時「揞住自己良心，將佢同記者講嘅嘢喺立法會公開講，留喺會議記錄入面，我一定會公開駁斥佢！為死難者討回公道！」
等同否認南京大屠殺
民主黨主席、支聯會秘書何俊仁更直斥，馬力為六四屠城開脫，不斷以廣場有沒有死人轉移視線，與日本右派利用南京大屠殺死亡人數大造文章，否認南京大屠殺一樣無恥，「佢同日本右派成日借南京大屠殺死亡人數不準確，就否認有南京大屠殺有乜分別？我情願民建聯唔講（六四）好過講，咁樣講仲無恥。」
民運人士與馬力言論對照
民運人士：當時解放軍未待學生離開天安門廣場，就突然關燈，以槍及坦克清場，大批學生中槍。
馬力：唔可以話共產黨六四屠城，如果係屠城，呢條友（學生領袖柴玲）第一個殺咗佢啦……如果要屠，嗰四千人（學生）應該死晒。
民運人士：有逃離廣場的學生稱，解放軍將被打死學生的屍體及營幕燒毀。
馬力：乜嘢叫天安門燒屍？唔通就咁就可以喺天安門燒屍？如果係咁啲焚化爐就唔使排咁耐。
民運人士：有學生曾目睹解放軍以坦克清場時壓倒走避不及的學生。
馬力：乜嘢叫坦克車碌到變肉餅？咁咪搵隻豬去試吓係咪會變肉餅囉﹗
民運人士：北京301醫院外科醫生蔣彥永，曾向中央引述大量他在六四時，搶救中槍死傷者例子，證明解放軍向群眾開槍。
馬力：我從來冇話六四冇死過人，只係覺得唔係屠城，因為屠城係刻意殺人，揸住支槍周圍射就係刻意殺人。
資料來源：支聯會網頁及馬力
