陳文媛（BoBo）自04年同舊愛陳冠希分手後，翌年喺友人介紹下，即重拾心情同金融公司董事金紫耀（Philip）相戀，佢哋舊年仲一齊出席港麗酒店倒數活動，二人前晚又十指緊扣喺澳門氹仔拍拖出席皇冠酒店開幕晚宴，大晒甜蜜。
近年已經冇唱歌同再演出嘅BoBo，靠男友傳授投資心得，不愁生活，所以前晚着住黑色吊帶晚裝嘅佢，身上都佩戴咗唔少首飾，打扮高貴。年屆36歲、生得一張babyface嘅金紫耀似乎好冧女友BoBo，除不時情深對望外，又大玩拖手仔，甜蜜之情溢於言表。
低調過生活
BoBo前晚同男友喺晚宴上玩到11點先離開，仲全程做跟得女友，當男友同友人喺會場外等車離開時，成班男人不停吹水，BoBo雖然好悶但都有陪笑，細心嘅金紫耀察覺到女友發呆，即時擰轉頭撩女友傾偈，大約15分鐘後，BoBo先同男友坐平治房車返酒店。
呢次BoBo全程投入同圈外人拍拖，放棄幕前演出，仲過住低調生活，雖然舊年底一度傳出BoBo懷有三個月身孕，但前晚見佢雖然養尊處優肥咗少少，但明顯冇肚凸凸。
