歐洲球壇兩大最高榮譽盃賽，歐協盃決賽聽晚深夜率先舉行，由愛斯賓奴同西維爾上演全西班牙對碰。
兩隊近年喺聯賽碰頭，互有輸贏，但以西維爾略為佔優，近20次錄得10勝4和6負。好多球迷會話，一場過生死戰好睇球員臨場發揮，往績未必可作準，呢點我絕對認同，殺得入決賽都已經身經百戰啦！不過咁，西維爾今季嘅表現，又確係令人眼前一亮，繼上周中西班牙盃贏拉科魯尼亞殺入決賽後，聯賽喺主場又擊敗維爾瓦，距離「3冠王」又踏前一大步。
愛斯賓奴喺剛啱嘅聯賽作客皇馬，由於刻意收起部份主力準備呢場大戰，咁輸1球都算有所交代。佢哋喺聯賽「位列中游，無慾無求」，大可瞓身踢呢場波。愛斯賓奴喺今屆足協盃以不敗之身殺入決賽，演出神勇，同聯賽相比，簡直判若兩隊。話雖如此，但論整季表現同穩定性，西維爾就明顯靠得住好多。今場信多佢一鋪，成功衞冕歐協盃，90分鐘內KO對手。
PHONE波熱線：1831678
（開放時間：今日11:00pm至明日0:15am）
阿鵬
有線球彩台主持
電郵：[email protected]