摩根士丹利前亞洲首席經濟師謝國忠舊年10月突然離職，最近有消息話，佢終於搵到日後嘅路向，就係由經濟分析師變身做投資基金經理。
據內地《經濟觀察報》嘅消息，謝國忠諗住向身邊熟人籌集2億至3億美金，組建一個私募股權投資俱樂部，主要投資內地未上市企業。謝國忠承認，𠵱家仲係籌備緊，所以冇正式資料可以公布。
大摩舊同事意見有保留
其實謝國忠一直有興趣做基金經理，喺大摩期間，就暗示過想參與基金業務。不過有大摩人士對佢咁嘅轉變有啲保留，佢話一個優秀嘅分析師，同一個優秀嘅市場人士好唔同，你可以預測經濟發展周期，但喺資本市場上，有時係唔按常理出牌，現實嘅市場同研究嘅對象，係完全唔同。不過講到尾，最重要都係睇回報成績，我哋不如耐心睇吓。
[email protected]