澳門賭業已經取代咗美國拉斯維加斯嘅一哥地位，咁一啲關於賭業嘅盛事，自然會喺澳門舉行啦。
下個月，澳門就舉辦一個亞洲最大嘅博彩業貿易展覽會──第一屆「亞洲國際博彩博覽會」，聽講全球賭業界嘅領袖都畀面出席，夠晒大陣仗，話題梗係離唔開講賭啦。
賭王何鴻燊千金、信德同美高梅金殿超濠股份有限公司董事總經理何超瓊，係大會舉辦論壇嘅嘉賓講者之一。呢個盛事應該唔少得何鴻燊，同埋佢個乖仔、新濠國際主席何猷龍，咁到時一家三口肯定係各方焦點所在。
大會主題係「博彩業現狀：大洋洲市場的增長」，重點討論亞洲各地博彩業嘅巨大增長，同埋對整個行業嘅影響。其他講題如「澳門：亞洲博彩巨頭」，已經好明顯帶出咗澳門博彩業嘅地位同份量呢個訊息。
出席盛事 有證書留念
不過，華華較有興趣嘅題目係「扭轉局勢：科技將如何改革桌牌遊戲和老虎機」，淨係聽個題目，相信唔少賭仔都即時好想知內容係乜，事關好影響第日去賭嗰陣，自己嘅贏面究竟係大咗定係細咗？
呢個咁特別嘅博彩博覽會，喺6月13至14號舉行，之前一日就舉行論壇。有出席呢次盛事嘅業界，通通都會獲內華達大學拉斯維加斯分校國際賭場學院頒發證書一張留念。
乜原來賭錢都有書讀嘅，華華都係第一次聽咋，咁唔知「賭神高進」有冇報讀過呢？
[email protected]