韓國歌手Rain雖然今年無緣入選美國《時代》周刊嘅「全球100大最有影響力人物」，不過佢就得到強大嘅網友支持，喺《時代》周刊搞嘅網上選舉中，就有42萬名網友選佢為心目中最有影響力人物，難怪連美國名嘴科爾伯特（StephenColbert）都要嘲笑佢一份，喺節目度扮Rain唱出《躲避太陽的方法》。
阿Net喺網上睇過段片，科爾伯特模仿Rain嘅金曲《躲避太陽的方法》MV，着住件大褸之餘，仲不時除咗衫露胸肌同麒麟臂，不過科爾嘅一身豬腩肉真係唔敢恭維。科爾仲將歌詞改為韓文加英文混合體，唱出「He'ssingin'inKorean」，又加插泡菜（Kimchi）同Hyundai（現代汽車）等為人熟悉嘅韓國嘢，最後佢更將本《時代》周刊拋出掟爛玻璃，連MV原有情節都模仿埋。
選舉排第二
科爾伯特本身係最有影響力人物選舉嘅第二名，擺Rain上枱都係為節目搞搞氣氛，可惜韓國fans睇到後，覺得科爾唔止侮辱Rain，仲侮辱埋所有韓國人。事件噚日被韓國傳媒大事報道，阿Net都認為科爾今次真係玩大咗！
《躲避太陽的方法》MV搞搞震
網址： http://justjared.buzznet.com/2007/05/12/stephen-colbert-rain/
網址： http://www.youtube.com/watch?v=Eic-X6L8FP4
版主：阿Net
本欄逢周一至六刊出