大陸股市狂升，今次唔止和尚忍唔住破戒開戶炒股，連4歲大嘅𡃁仔都話要炒埋一份。網友索羅斯123喺《新華社區》引述咗一篇大陸報章嘅新聞，話有個4歲小朋友佳佳，自從舊年10月份起，日日跟住媽咪去股票行，有個記者問佳佳：「點解媽媽成日帶你嚟股票行？」佳佳答：「今年係牛市，媽媽要贏錢嘛！」
有樣學樣 教壞細路
同佳佳一樣係股票行「小」常客嘅，仲有另一位年紀差唔多嘅小妹妹，佳佳話：「佢爸爸都係日日嚟呢度炒股，見得多咗，我哋就一齊玩。」
嗰個記者同兩個小朋友傾咗10分鐘，都見唔到佢哋嘅爸爸媽媽，雖然股票行唔算品流複雜，但始終人多口雜，所以記者又問：「你媽媽唔怕你跟陌生人走咩？」佳佳話：「媽媽要睇住啲股票，睇緊啲就贏多啲，我第日大個仔，都要炒股賺錢！」
金錢誘惑 難以抗拒
對於呢個小朋友立志炒股嘅報道，網友帝鸞就唔係幾信，「童言無忌，呢種講法冇說服力。」
不過，另一位網友道者就話：「細路仔所處嘅環境，對佢一生影響非常大，4歲就日日喺股票行打躉，我睇唔係咁好，唔係話股市唔好，而係股市有好大金錢誘惑。」
http://forum.xinhuanet.com/detail.jsp?id=42792923
報料站
歡迎提供網上財經趣聞，資料一經採用，酬100元。
請附姓名、電話及電郵地址，交[email protected]