美國《福布斯》雜誌早前公布，蘋果公司行政總裁喬布斯（SteveJobs）舊年雖然只係象徵式收取1美元年薪，但拜蘋果股價暴漲所賜，佢行使認股權獲利6.47億美元（約50.47億港元），成為去年全美500大企業收入最高嘅CEO。msnbcbizeds喺《MSNBC討論區》問：「美國CEO咁高薪，究竟值唔值？」
okiecraig話：「美國部份CEO人工真係太高，好似我間公司，雖然股價跌，但CEO舊年年薪接近1000萬美元，仲有公司車、司機等福利；就算一星期做60小時，佢每個鐘頭都賺成3205美元（約2.5萬港元）。公司其他職員就冇咁好彩，舊年只係加薪3%。」
唔肯減薪會暴動
RvaninSanDiego講：「我信奉資本主義，唔主張嚴格管制薪酬，但亦認為美國有啲CEO嘅人工高到離晒譜。如果維持現有加薪幅度，高層同低層職員嘅薪金會越拉越遠，所以我估計，CEO將來嘅加薪幅度可能放緩。」
PatfronLehighAcres仲話：「如果CEO唔肯減薪，睇怕會引發暴動。」
調查發現，美國500大CEO舊年總收入激增38%，達75億美元，平均每人每年賺1520萬美元。
AlexinNewYork就講句公道話：「CEO肩負重任，所以應該享有高薪。我識得有個CEO，佢每星期做成80至90個鐘，返到屋企仲要做公司嘢，周不時喺夜晚收到老闆嘅電話，一起身就要作出好重要嘅商業決定，年薪只有20萬美元。」
喬布斯任內雖然推出好多新產品，令蘋果鹹魚翻生，但佢舊年未能獲《福布斯》選為「最物超所值」嘅CEO；喺「最佳CEO」排行榜入面，佢只係排第39位。